Көлік және коммуникация министрлігі көлік саласындағы заңнаманы жетілдіру жөніндегі жұмыс тобын құруға бастама жасауда.

Көлік және коммуникация министрлігінде ҚР туристік нарығында чартерлік тасымалды дамыту мәселелері жөнінде кеңес өтті. Кеңесті қорытындылаған министр Жеңіс Қасымбек Азаматтық авиация комитетіне  көлік саласындағы нормативті-құқықтық актілерді жетілдіру жөніндегі жұмыс тобын құруға тапсырма берді деп хабарлайды http://mtc.gov.kz. сайты.

Қазіргі кезде Азаматтық авиация комитеті мүдделі мемлекеттік органдардан, Ұлттық кәсіпкерлер палатасынан, туристік ұйымдар мен авиакомпаниялардан комиссияға кіретін кандидатураларын күтуде.

Жұмыс тобының негізгі мақсаты – туристік компаниялардың клиенті болып табылатын Қазақстан азаматтарын келеңсіздікке ұшырататын қиын жағдайларды болдырмау. Туристердің мүдделерін қорғау мақсатында жұмыс тобы көлік саласына, оның ішінде тасымалдаушыларға қатысты заңнамаға өзгерістер енгізу жұмысын жалғастырып, аталған саланы жетілдіру жөнінде ұсыныстар беретін болады.

«Жұмыс тобын құру туристік ұйымдар мен тасымалдаушылар жұмысындағы кездесетін сәйкессіздіктерді айқындауға көмектеседі. Көлік және коммуникация министрлігі өз құзырында халықтың өмірі мен денсаулығына қатер төндірмей қауіпсіз ұшуларды қамтамасыз ету үшін мүмкіндігінше жағдай жасап, ерекше көңіл аударып отыр», - деді Азаматтық авиация комитетінің төрағасы Бекен Сейдахметов.

Абай-ақпарат