...Жабыққанға жол беріп,

Торыққанға ем беріп,

Тарыққанға дем беріп –

                            Сүйеу болған Ақ Ана!

Адасқанды жөнге сап,

Жаратқанды ойға сап –

                            Тіреу болған Ақ Ана!..

Өткенді қайта жаңғыртып,

Өшкенді қайта жандыртып,

Тыңнан түрен салдыртып –

                            Жол бастаған Ақ Ана!

Ақ жолға сілтеп халқыңды,

Жаңғыртып ескі салтымды –

                            Ел бастаған Ақ Ана!...

Үзілген жалғап үмітті,

Сейілткен қайғы, күдікті,

Ұлықтап әдет-ғұрыпты –

                            Ардақтаған Ақ Ана!

Жылатпай қанша әруақты,

Құлатпай қанша шаңрақты –

                            Қорғап қалған Ақ Ана!..

Емсіздерге ем беріп,

Әлсіздерге әл беріп,

Дәрменсізге дем беріп –

                            Пана болдың, Ақ Ана!

Ұлы жоққа ұл беріп,

Қызы жоққа қыз беріп –

                            Ана болдың, Ақ Ана!..

Күлмегенді күлдіріп,

Жүрмегенді жүргізіп,

Тұрмағанды тұрғызып –

                            Шипа бердің, Ақ Ана!

...Қажеті не жасырып,

Қасиетіңе бас ұрып,

Дауа тілеп жаныма,

Сая тілеп тағы да –

                            Қайта келдім, Ақ Ана!

                            Қайта келдім Ақ Орда!..

Тұрмағанбет Кенжебаев – ақын,

Қазақстан Жазушылар және

Журналистер Одағының мүшесі.

 13. 07. 2015 жыл. Қаскелең.

Abai.kz