Еліміздегі отбасылардың 16 пайызы бала сүю бақытына қол жеткізе алмай отыр екен. Мамандар оның негізгі себептерінің бірі - еркектердің репродуктивтік проблемалары болып табылады дейді.

Астанада ҚР Мемлекеттік хатшысы Гүлшара Әбдіқалықованың төрағалығымен ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның кезекті отырысында осындай өзекті мәселе сөз болды.  өтті. Отырыста Ұлттық комиссия мүшесі, «Ұлттық нейрохирургия орталығы» АҚ директорлар кеңесінің төрағасы Бексұлтан Тұтқышевтің айтуынша, ҚР Конституциясының 27-бабы ана мен баланың, сонымен қатар əкенің денсаулығына кепілдік береді. «Ана мен бала денсаулығын сақтауда біз үлкен жетістіктерге жетсек те, өкінішке қарай, ер адамның, яғни əкенің денсаулығын сақтаудағы конституциялық норма бүгінгі күнге дейін өз шешімін таба алмай келе жатыр», - деп атап өтті ол. Ббылтыр бірқатар талқылаулардан кейін алғаш рет ер адамдардың денсаулық мəселесі өз деңгейінде көтерілді. Соның нəтижесінде былтыр Денсаулық сақтау жəне əлеуметтік даму министрлігі емханалар жанынан андрологиялық кабинеттер ашу туралы бұйрыққа қол қойды. «Яғни, бүгінде денсаулық сақтау туралы конституциялық норманы жүзеге асыру қолға алынды. Ер адамдар арасындағы өлім-жітімнің жоғары көрсеткіші жəне басқа да мəселелер туралы біз жақсы білеміз. Сондықтан бұл өз уақытында қолға алынған шара деп ойлаймын. Енді 5-10 жылдан кейін жағдай тұрақтанады деген үміттеміз», - дейді Б.Тұтқышев.

 Абай-ақпарат.