Қырғыз ағайынды қатты жақсы көремін. «Ой, бұлбұлды» нәшіне келтірген Нұрақ Әбдірахмановты айтсайшы, он алты жасында ғана аяғына тұрғанмен, Қарабалтаны қалай керемет сомдаған Сүйменқұл Чокморовты айтсайшы.. Ұнайды адамы. Қиырындағы Ош, Жалалабад, Өзгеннен мынау Талас, анау Ыстықкөлге дейін болғанмын. Ұнайды жері. Бірақ, саясаткерлері еш ұнаған емес. Атамбаев жайлы жақ ашпағаным да содан – сөзім рәсуә.

Кеше ме, әлде кеш көрдім бе, қырғыздың http://www.gezitter.org ресурсы қып-қызыл өтірік материал басып, оны Орталық Азия халықтарының төрт бірдей тіліне аударып тастапты. Сондағы құрт түскен өзегі - ЭКСПО көрмесін салған біздің жұмысшылардың айлығын төлемегендіктен, олар алаңға шығыпты-мыс. Қай қала, қай алаң? Бұл жөнсіз материал белгілі себептермен ашылмайтын «қазақстандық сайттарға» жөн сілтейді. Түсінікті шығар, шеру жайлысы шикі өтірік - ешкім көшеге шыққан жоқ. Енді осындай ерсі жаңалықты басуға қырғыз либералдарын не қамшылауы мүмкін дерсіз? Мүмкін, ЭКСПО-да тек қазақстандық құрылысшылардың еңбек еткені жүйкелеріне тиген шығар. Себебі, қанша уақыттан соң қазақтар көрші елдің жұмыс күшінсіз-ақ өз шаруасын сайлап алды. Былайша айтқанда, «қарапайым қырғыздарға бізден нәпақы айыруға мүмкіндік бермеппіз».