Елбасының  “Қазақстандықтардың әл-ауқатының өсуі: табыс пен тұрмыс сапасын арттыру”  атты Қазақстан халқына жолдауында келер жылы елімізде кем дегенде 100 спорт кешені салынуы қажет деген болатын. Сондай-ақ тұрғын үйлердің аулаларына, мектептер мен саябақтарда спорттық алаңдарды көбейту және дене шынықтыру мен сауықтыру орталықтары балалар мен жасөспірімдер үшін қолжетімді болуы керектігін айтты.

Осыған орай Түркістан облысының Бәйдібек ауданында өңір басшысы Жансейіт Түймебаевтың қатысуымен бірқатар спорт нысаны пайдалануға берілді. Атап айтқанда, ауданда бұған дейін болмаған жабық теннис корты мен жабық жүзу бассейні ашылды. Облыс әкімі спортқа ден қойған ауданның бір топ жастарымен арнайы кездесіп, пікір алмасты.

«Бұрын мұндай нысандар көбінесе қалалық жерлерде бой көтеріп, шаһарда өмір сүретін жастар үшін ғана қолжетімді болатын. Енді, міне, ауылдық жерлерде де тек спорттың күрес, бокс түрлеріне ғана емес, өзге де сирек шұғылданатын спорт түрлеріне мемлекет тарапынан басымдық беріліп келеді. Бұл, Елбасымыздың таяуда жариялаған Жолдауында айтылғандай спортқа тереңірек мән беріп, халықтың салауатты өмір салтымен айналысуы керектігі туралы айтқан тапсырмасының біздің өңірде орындалып жатқанының айғағы деп білем», - деді аймақ басшысы.

Айта кету керек, аудан мен ауылдық жерлерде заманауи спорт нысандарының көптеп ашылуы тегін емес. Бәйдібектен бұған дейін Марат Мықтыбеков (Азиядағы дзюдо федерациясының президенті), Еркебұлан Шынәлиев (2008 жылы Бейжіңде өткен Олимпиаданың бокстан қола медаль иегері), Қасымхан Төленбай (Қазақ күресінен Әлем чемпионы) сынды спорттағы оғландар шыққаны белгілі. Бұдан кейін де ауданда бүгінгі пайдалануға берілген спорт нысандарының арқасында аталған сайыпқырандардың жолын жалғайтын, ауданның мерейін одан әрі үстем ететін жастар шығатынына сенім зор. Жалпы құны 1,3 млрд теңге болатын Шаян ауылында ашылған нысандардың демеушісі шетелдік инвесторлар. Атап айтқанда, құрылысы былтыр басталған спорттық обьектілердің тапсырыс беруші мекемесі «International fund for Houbara Conservation» корпоративтік  қоры. Жабық теннис кортында барлық жағдайлар жасалса, бассейнде бір ауысымда 32 адам жүзу спортымен машықтана алады.

Осыдан соң, бұл күні спорттың волейбол, баскетбол, футбол, теннис түрлері мен спорт залдарына арналған ашық алаңшалар пайдалануға берілді. Жалпы бүгінгі таңда Бәйдібек ауданында балалар мен жасөспірімдер  спорт мектебі жұмыс істейді. Онда спорттың 10 түрінен волейбол, баскетбол, футбол, үстел теннисі, тоғызқұмалақ, бокс, қазақ күресі, дзюдо, грек-рим, еркін күрес бөлімдері болашақ чемпиондарды жаттықтыруда.   Спорт мектебінде қазіргі таңда 84 бапкер 157 топта 1810 оқушымен жаттығу жұмыстарын жүргізеді. Жыл басынан бері ауданда 97 спорттық іс-шара ұйымдастырылып, 9 мыңға жуық аудан тұрғыны қатысқан.

Облыстан барған жұмысшы топ ауданға сапары аясында Бәйдібек Қарашаұлы ескерткішіне гүл қою рәсімін өткізді. Бұдан кейін, Бәйдібек ауданынан шыққан елімізге белгілі азаматтардың басын қосқан «Шежірелі Шаян, Берекелі Бәйдібек» форумы өтті. Онда тарихқа бай ауданның өткені мен келешегі туралы баяндамалар оқылып, Бәйдібектің әлеуметтік-экономикалық дамуына үлес қосқан бірқатар азаматтар марапатталды.

Abai.kz