Елбасы Н.Назарбаевтың «Ұлы даланың жеті қыры» атты мақаласына орай Түркістан облысының Өңірлік коммуникациялық қызметінде баспасөз мәслихаты өтті. Брифингке қатысқан «Сақ» киностудиясының директоры Нұриддин Пәттеев Президент мақаласындағы қойылған мақсаттар төңірегінде Түркістан облысында жүзеге асқан жобаларға тоқталды,- деп хабарлайды ҚазАқпарат тілшісі.

Нұриддин Пәттеевтің сөзінше, өткен жылы өңірде облыс әкімі Жансейіт Түймебаевтың қолдауымен «Көне жетігеннің сыры» атты 10 сериялы телехикая түсірілген.

«Рухани жаңғыру» бағдарламасы аясында түсірілген туындылар көрермен қауымға ұсынылды. Бұдан өзге, «Киелі Қазығұрт»,  «Отырарды қорғау», «Күш атасы - Қажымұқан», «Бәйдібек би» атты анимациялық фильмдер республикалық және жергілікті телеарналарда көрсетілді. Сондай-ақ, «Ұлы Жібек жолындағы ескерткіштер» атты деректі фильм таспаланып, көпшілік тамашалап үлгерді», - деді Нұриддин Пәттеев.

Айта кетейік,  Мемлекет басшысының «Ұлы даланың жеті қыры» мақаласында туған жер мен тұлғаларды танытатын кино және анимациялық туындылар түсіру қажеттігі айтылған болатын.

«Жалпы, халықтың санасында фильмдердегі жарқын кинообраздар іргелі ғылыми монографиялардағы деректі портреттерден гөрі маңыздырақ рөл атқарады.  Сондықтан, тез арада Қазақстанның өркениет тарихының үздіксіз дамуын көрсететін деректі-қойылымдық фильмдердің, телевизиялық сериалдар мен толықметражды көркем картиналардың арнайы циклын өндіріске енгізу керек. Ұлт қаһармандарын үлгі тұту үрдісін қалыптастыруға жол ашатын сапалы балалар фильмдері мен мультипликациялық сериалдарды аса қажет ететін өскелең ұрпақтың да талғамына ерекше назар аудару керек. Біздің даңқты батырларымыз, ойшылдарымыз бен ел билеушілеріміз - тек Қазақстан ғана емес, сондай-ақ бүкіл әлем бойынша еліктеуге лайықты тұлғалар» деп атап көрсеткен.

Бұл ретте ағымдағы жылы облыс басшысының  қолдауымен өңірде «Ордабасы - бірлік туы» атты анимациялық фильмнің түсірілімі аяқталып, тұсаукесері жоспарлануда. Сонымен қатар, «Түркістан», «Оқсыз» анимациялық фильмдері мен «Төле би» телесериалының түсірілім жұмыстары жалғасып жатыр.

Abai.kz