Сириядан 47 адамды қайтарып алдық. Кім не десе о десін, мен бұл қадамды қолдаймын. Маған операцияның атауы ерекше ұнады. Жусан. Қандай тамаша және мағыналы. Қазақ үшін жусанның қадірі мол. Кезінде сол Сирияға әмірі жүріп, билік еткен бабамыз Бейбарыс та жусанның иісін аңсап өткен деседі. Жусанды сағынғаны Қыпшақ даласын, Қазақ жерін аңсағаны ғой.

Ал бүгін сол жусаннан жалған жиһадты артық көргендерді кері қайтардық. Жаңылып, адасқандарға қайта мүмкіндік сыйладық. Әрине, қате қадам жасамайтын адам жоқ. Санасы уланып, жат ағымның жетегінде кеткендерге қолды бір сілтесек те болар еді. Бірақ онда біздің қазақтығымыз қайда қалады?! Қазақтан безіп, тұманды тағдырда адасқан жандарды кері қайтарып, қазақы ортаға қайта қоссақ - ұлы жеңіс сол болмақ. Ол тек қана Сирияға кетіп, сандалғандарға ғана қатысты емес. Тілінен безіп, ұлтынан айнып, тарихынан қашқандарға да қатысты дүние.