Düysenbi, 21 Tamız 2017

Joba turalı

Abay.kz aqparattıq portalınıñ Doktrinası

Biz, qazaqtıñ bir top jas sayasatkerleri, ğalımdarı men jurnalisteri, keñ-baytaq Otanında basım wltqa aynalğan qazaq jwrtına arnap «Abay.kz» aqparattıq portalın aşıp, eliniñ bügini men bolaşağın oylağan azamattardıñ barlığın osı resurstıñ aynalasına birigip, erkin oy men parasattı pikir aytuğa şaqıramız.

Bwdan däl 100 jıl bwrın, 1909 jılı Twrağwl Qwnanbaev, Käkitay Isqaqwlı jäne Älihan Bökeyhan üşeui sergek qimıldap, sonau Sankt-Peterbor qalasınıñ mwsılman baspasınan wlı dala abızı, qazaqtıñ oy-sanasına silkinis jasağan ğwlama  oyşılı - Abaydıñ twñğış öleñder jinağın basıp şığarıptı.

Bizdiñ oyımızşa, osı oqiğa qazaq ziyalılarınıñ biriguine ıqpal etti. Abay şığarmaşılığı kerueninen sän ketken köşpeli qoğamnıñ abırjığan köñilin aulap, zamanğa layıq tirşilik jasauğa bel şeşe kirisip, ağartu jwmısına den qoyğan jañaşıl küşterdi, abayşıl buındı düniege äkeldi.

Abayşıl buın bağıt-bağdarınan ayırılğan qazaqtıñ ruhın oyatıp, alda twrğan tarihtıñ swrapıl sınınan sürinbey, «tar jol, tayğaq keşulerden» wlttıq bolmısın, tilin, dilin, dinin, tarihın aman alıp şığatın jasampaz wrpaqtı qalıptastıru jolında ayanbay eñbek etti. Abaydıñ kitabınan keyin «Ayqap» jurnalı men «Qazaq» gazeti düniege keldi. Älemdik deñgeyde bilim alıp, älemdik elitamen terezesi teñ twrıp tildesken abayşıl buın uaqıt öte bügingi täu etken täuelsizdigimizdiñ irgetasın qalağan «Alaş» qozğalısın qwrdı.

Endi, mine, arağa 100 jıl salıp külli adamzat balasına kitap betinen ün qatqan hakim atamız jaña däuirde öziniñ jaña buın jas dostarımen birge älemdik aqparat keñistigine ayaq bastı. Birden eskertemiz: biz «qayran, elim, qazağım» dep qamıqqan äz twlğanıñ esimin wran qılıp wpay jinaudan aulaqpız. Tağı da qadap aytamız: az ğana toptıñ auzındağı sözine, kökeyindegi piğılına Abay atın aralastırıp aruaq küñirentuge qasıq qanımızben qarsımız. Abay bärimizge ortaq. Abay salğan jol, Abay körsetken önege bärimizge ülgi. Endeşe, ekpini esti alatın zamana köşine esesin jiberip, eñsesi tüsip qala beretin halqımızdı ärbir qapıl isten abay jüruge şaqırsaq, onıñ nesi ayıp?

Bizdiñ maqsatımız - Abay mwrasın, Alaş ösietin keşendi türde nasihattap, jarıq körgen kitaptar men baspasözde basılğan tañdaulı maqalalardı bir arnağa toptastırıp, onı älemtor arqılı älemge paş etu! Abayşıl äm Alaş wranın mwrat twtqan  qazaq eliniñ şınayı patriottarın qalıptastıru isine üles qosu. Biz portalğa kirgen oqırmannıñ «Abay» jäne «Alaşorda» taraularınan ana tilimizde jarıq körgen şığarmalar jiıntığınan mol mağlwmat aluına müddelimiz. Biz abayşıl azamattardıñ barlığın saytqa janaşır bolıp, onıñ kitaphanasın bwrın şıqqan nemese bolaşaqta jariyalanar tuındılarmen tolıqtırıp twruğa ündeymiz!
Endigi bir maqsat  - qazaq jurnalisteri men internet-twtınuşılarınıñ basın qosıp, jalpıwlttıq aqparat keñistigin qalıptastıru. Portalda respublikalıq qazaq basılımdarında qızmet jasaytın jurnalisterdiñ üzdik maqalaları jarıq körip twradı. Apta sayın portaldıñ taraularında äleumettik zertteuler men twraqtı talqılar jürgiziledi. «Abay.kz» portalınıñ basqa internet-resurstardan erekşeligi - mwnda Qazaqstannıñ barlıq aymaqtarındağı qazaq baspasözi ökilderi bir twtas qauımğa aynalıp, öz oyların ortağa saludıñ mümkindigine ie. Osı mümkindiktiñ nätijesinde, mısalı, Atırau jurnalisteri Altaydağı äriptesteriniñ şığarmaşılığımen tanısıp, Qızılordanıñ jastarı özderiniñ qızıljarlıq dostarın alañdatıp, tolğatıp jürgen mäseleler haqında habardar boladı. Aymaqtağı jurnalister respublikalıq basılımdardağı zamandastarımen aralasıp, ortaq taqırıptar töñireginde oy bölise aladı. Sonday-aq portal arqılı elimizge tanımal twlğalarğa barlığımız swraq qoyıp, olardıñ wlttıq därejedegi internet-konferenciyaların ötkizip otıramız.

Portalımızdıñ atın «Abay.kz» dep qoyuımızğa jäne bir sebep bar. Bizdiñ tüsinigimizşe, abayşıl wrpaq elimizdiñ ötkeni men büginine häm erteñine sergek qarap, abay boluı abzal.

Olay bolsa, älem kartasında aylapat kölemimen tañbalanğan jerimizdiñ bütindigi men wltımızdıñ twtastığına abay bolayıq!

Kök nayzasın köldeneñ wstap jortqan babalardıñ erligi men mwrasına, bolaşaqtan alapatı asqan Alaş jwrtın körgisi kelip, ğwmırın kürespen ötkergen ğaziz ağalar amanatına abay bolayıq!

San ğasırdıñ sabağınan tüzilip, sanamızdı qalıptastırıp wlı dala tösinde saltanat qwrğan salt-dästürimizge abay bolayıq!
Körikti oyımız ben keudemizdegi säuleni söyletken tilimizdi tilip tastauğa bar äreketterden abay bolayıq!

Tartıp mingenniñ taqımında ketken tarlanbozday tağası tauğa qadalıp, twyağı qwmğa siñgen baba tarihımızdı endi bireuler  enşilep almas üşin abay bolayıq!

Qara jerdiñ qırtısın jamılğan qazına-baylığımız wqsatıp wstamaytınnıñ, ter tögip tistemeytinniñ wrı qaltasında ketpes üşin abay bolayıq!

Sıqpıtın jasırıp kelip, ortamızğa sına qağıp oynaytın sırtqı müdde, sınıq peyilden abay bolayıq!

Bar qazaq - bir qazaq. Bir qazaq - bar qazaq. Iğıp söylemeytin, ıqtap ömir sürmeytin bekzat bolmısımızğa abay bolayıq!

Altay men Atıraudıñ, Alatau men Arqanıñ arasındağı aqparat keñistiginiñ alatayday bülinbeuine abay bolayıq!

Abayşıl bolayıq, ağayın! Abay bolayıq!

15 säuir, 2009 jıl