Сонымен латын қаріпіне өтуге бет бұрдық. Құрметті оқырман, сіз суреттен көріп отырған нұсқа кеше Мәжілістің отырысында депутаттарға ұсынылған жоба. Әзірге жоба. Жобаның жуық арада мақұлдануы да мүмкін. Ұлттық, мемлекеттік мазмұны терең мәселеге байланысты қазір әлеуметтік желілер мен сайттарда қызу пікірталас жүріп жатыр. Көпшілік латын қаріпі нұсқасындағы қазақ әліпбиін қолдауда, қарсы пікір айтушылар да бар. Алайда, латынға көшудің мән-мағынасына тереңірек үңіліп отырған зиялы жас қауым өкілдері басым дауысқа ие болуда. Соның бірі беліглі саясаттанушы Ерлан Сайыров былай дейді:

Құрметті достар!
Әліпбиді ауыстыру оңай шаруа емес, ол анық дүние. "Бес саусақ бірдей емес", әр-алуан пікір болады.
Мен бұл мәселені ең басынан қолдап келе жатырмын.
Шыны керек, біз кешігіп келеміз. Бұл графикаға 2000 жылдардың басында өтіп кетуіміз керек еді. Латын әліпбиі не үшін керек? 
Ол көптеген рухани "фобияларға" иммунитет. Имунитет үшін вакцина енгізген кезде кім болса да басында ауырады. Бірақ, ол кезең өтеді. Өткеннен кейін организм көптеген ауыруға төзімді келеді. Біздің латын әрпіне қарасты ой-пікірлерімізді медициналық ұғымда осылай бейнелеп айтуға болады. Сондықтан, нақты ұсыныстарды беріп, ғалымдардың ортасына салып, шешім шығарып, бұл мәселені мәңгіліке жауып тастауға тиіспіз. Латын әрпі бііздің болашағымыздың кепілі!
Бұл - аксиома!
Мен өзім, ешқандай машығым болмаса да, комиссия ресми түрде әліпбиді қабылдаған күннен бастап, қазақ тілінде тек қана латын әрпімен жазатын боламын!
Қанша қиын болса да!
Өйткені, адам "комфорт аймағынан" шығуға қабілетті болған кезде ғана дамуға бейімделеді!
Нақты ұсыныстарды беріп, талқылауға тек ғылыми тұрғыда қатысып, алға жылжитын уақыт келді.
Біздің балаларымыз гаджет, айфон арқылы "атам заманда" латын әрпіне өтіп кеткен. Балаларымыздан ұят болып жүрмесін. Осыны да ескерейік!

Abai.kz