Týrki mәdeniyeti jәne múrasy qory «Oljas Sýleymenov Ázerbayjan kózimen» kitabyn tanystyrdy.

XII Baku halyqaralyq kitap kórmesi ayasynda Týrki mәdeniyeti jәne múrasy qory shygharghan «Oljas Sýleymenov Ázerbayjan kózimen» kitabynyng túsaukeseri ótti. Kitapqa kórnekti aqynnyng әzerbayjan halqynyng Jalpyúlttyq kóshbasshysy Geydar Áliyevpen tarihy súhbattary, Oljas Sýleymenovting Jalpyúlttyq kóshbasshy turaly bergen súhbattary, sonday-aq Ázerbayjan Respublikasynyng Preziydenti Iliham Áliyevting aqyngha qatysty resmy ókimderi engen.

Kórnekti qazaq aqyny, jazushy, oishyl jәne qogham qayratkeri Oljas Sýleymenovting 90 jyldyq mereytoyyna arnalghan basylymnyng túsaukeserinde Týrki mәdeniyeti jәne múrasy qorynyng preziydenti, professor Aqtoty Rayymqúlova, Ázerbayjannyng halyq jazushysy Elimira Ahundova, Ázerbayjan Últtyq ghylym akademiyasynyng Nizamy Gәnjauy atyndaghy Ádebiyet institutynyng atqarushy diyrektory Mehman Gasanly, kitap avtory, filologiya ghylymdarynyng doktory, professor Nizamy Tagisoy, sonday-aq filologiya boyynsha filosofiya doktory, aqyn Adili Djamili sóz sóiledi.

Qúttyqtau sózinde Týrki mәdeniyeti jәne múrasy qorynyng preziydenti, professor Aqtoty Rayymqúlova Oljas Sýleymenovting týrki әlemining ghana emes, býkil adamzattyng kórnekti túlghalarynyng biri ekenin atap ótti. Ol aqynnyng bay shygharmashylyq múrasy men qoghamdyq qyzmeti Ázerbayjanda әrdayym joghary baghalanghanyn, al әzerbayjan halqymen jәne ziyaly qauym ókilderimen ornatqan qarym-qatynasy halyqtarymyz arasyndaghy dostyq pen ruhany jaqyndyqtyng jarqyn ýlgisine ainalghanyn aitty.

Óz sózinde professor Aqtoty Rayymqúlova Oljas Sýleymenovting Ázerbayjanmen baylanystary onyng ómiri men qyzmetinde airyqsha oryn alatynyna toqtaldy. Aqynnyng 1990 jylghy 20 qantardaghy qayghyly oqighalardan keyin Bakuge kelip, әzerbayjan halqyna qoldau bildirui jәne qasiretke kinәlilerdi ashyq aiyptauy onyng berik ústanymy men Ázerbayjan halqymen tilektestigining manyzdy kórinisi bolghany atap ótildi.

Is-sharanyng kórkemdik bóliminde Ázerbayjan últtyq drama teatrynyng akteri Kazym Gasangúliyev Oljas Sýleymenovting ólenderin mәnerlep oqydy. Odan keyin Serik Núrmoldaev pen Jadyra Mýsirepovanyng oryndauynda últtyq muzykalyq aspaptar – dombyra men jetigenning sýiemeldeuimen qazaq muzykasynyng tuyndylary oryndaldy. Kórkemdik baghdarlama qatysushylargha qazaq mәdeniyetining bay muzykalyq dәstýrlerimen jaqynyraq tanysugha mýmkindik berdi.

Is-sharagha sonday-aq Ázerbayjanda tirkelgen diplomatiyalyq korpus ókilderi, әdebiyet jәne mәdeniyet qayratkerleri, zertteushiler men kitapsýier qauym qatysty.

Abai.kz