تۇركى مادەنيەتى جانە مۇراسى قورى «ولجاس سۇلەيمەنوۆ ازەربايجان كوزىمەن» كىتابىن تانىستىردى.

XII باكۋ حالىقارالىق كىتاپ كورمەسى اياسىندا تۇركى مادەنيەتى جانە مۇراسى قورى شىعارعان «ولجاس سۇلەيمەنوۆ ازەربايجان كوزىمەن» كىتابىنىڭ تۇساۋكەسەرى ءوتتى. كىتاپقا كورنەكتى اقىننىڭ ازەربايجان حالقىنىڭ جالپىۇلتتىق كوشباسشىسى گەيدار اليەۆپەن تاريحي سۇحباتتارى، ولجاس سۇلەيمەنوۆتىڭ جالپىۇلتتىق كوشباسشى تۋرالى بەرگەن سۇحباتتارى، سونداي-اق ازەربايجان رەسپۋبليكاسىنىڭ پرەزيدەنتى يلحام اليەۆتىڭ اقىنعا قاتىستى رەسمي وكىمدەرى ەنگەن.

كورنەكتى قازاق اقىنى، جازۋشى، ويشىل جانە قوعام قايراتكەرى ولجاس سۇلەيمەنوۆتىڭ 90 جىلدىق مەرەيتويىنا ارنالعان باسىلىمنىڭ تۇساۋكەسەرىندە تۇركى مادەنيەتى جانە مۇراسى قورىنىڭ پرەزيدەنتى، پروفەسسور اقتوتى رايىمقۇلوۆا، ازەربايجاننىڭ حالىق جازۋشىسى ەلميرا احۋندوۆا، ازەربايجان ۇلتتىق عىلىم اكادەمياسىنىڭ نيزامي گانجاۋي اتىنداعى ادەبيەت ينستيتۋتىنىڭ اتقارۋشى ديرەكتورى مەحمان گاسانلى، كىتاپ اۆتورى، فيلولوگيا عىلىمدارىنىڭ دوكتورى، پروفەسسور نيزامي تاگيسوي، سونداي-اق فيلولوگيا بويىنشا فيلوسوفيا دوكتورى، اقىن اديل دجاميل ءسوز سويلەدى.

قۇتتىقتاۋ سوزىندە تۇركى مادەنيەتى جانە مۇراسى قورىنىڭ پرەزيدەنتى، پروفەسسور اقتوتى رايىمقۇلوۆا ولجاس سۇلەيمەنوۆتىڭ تۇركى الەمىنىڭ عانا ەمەس، بۇكىل ادامزاتتىڭ كورنەكتى تۇلعالارىنىڭ ءبىرى ەكەنىن اتاپ ءوتتى. ول اقىننىڭ باي شىعارماشىلىق مۇراسى مەن قوعامدىق قىزمەتى ازەربايجاندا ءاردايىم جوعارى باعالانعانىن، ال ازەربايجان حالقىمەن جانە زيالى قاۋىم وكىلدەرىمەن ورناتقان قارىم-قاتىناسى حالىقتارىمىز اراسىنداعى دوستىق پەن رۋحاني جاقىندىقتىڭ جارقىن ۇلگىسىنە اينالعانىن ايتتى.

ءوز سوزىندە پروفەسسور اقتوتى رايىمقۇلوۆا ولجاس سۇلەيمەنوۆتىڭ ازەربايجانمەن بايلانىستارى ونىڭ ءومىرى مەن قىزمەتىندە ايرىقشا ورىن الاتىنىنا توقتالدى. اقىننىڭ 1990 جىلعى 20 قاڭتارداعى قايعىلى وقيعالاردان كەيىن باكۋگە كەلىپ، ازەربايجان حالقىنا قولداۋ ءبىلدىرۋى جانە قاسىرەتكە كىنالىلەردى اشىق ايىپتاۋى ونىڭ بەرىك ۇستانىمى مەن ازەربايجان حالقىمەن تىلەكتەستىگىنىڭ ماڭىزدى كورىنىسى بولعانى اتاپ ءوتىلدى.

ءىس-شارانىڭ كوركەمدىك بولىمىندە ازەربايجان ۇلتتىق دراما تەاترىنىڭ اكتەرى كازىم گاسانگۇليەۆ ولجاس سۇلەيمەنوۆتىڭ ولەڭدەرىن مانەرلەپ وقىدى. ودان كەيىن سەرىك نۇرمولداەۆ پەن جادىرا مۇسىرەپوۆانىڭ ورىنداۋىندا ۇلتتىق مۋزىكالىق اسپاپتار – دومبىرا مەن جەتىگەننىڭ سۇيەمەلدەۋىمەن قازاق مۋزىكاسىنىڭ تۋىندىلارى ورىندالدى. كوركەمدىك باعدارلاما قاتىسۋشىلارعا قازاق مادەنيەتىنىڭ باي مۋزىكالىق داستۇرلەرىمەن جاقىنىراق تانىسۋعا مۇمكىندىك بەردى.

ءىس-شاراعا سونداي-اق ازەربايجاندا تىركەلگەن ديپلوماتيالىق كورپۋس وكىلدەرى، ادەبيەت جانە مادەنيەت قايراتكەرلەرى، زەرتتەۋشىلەر مەن كىتاپسۇيەر قاۋىم قاتىستى.

Abai.kz