Украиналық Boeing 737 ұшағы Тегеран әуежайы маңында апатқа ұшырады, - деп хабарлайды РИА Новости.

Лайнердің "техникалық ақауға" байланысты Имам Хомейни атындағы халықаралық әуежайы маңында апатқа ұшырағаны айтылған. Бұл ақпаратты әуежай басшысы да растады. Ол ұшақтың әуежайдан ұшып шыққан бойда апатқа ұшырағанын мәлімдеді. Лайнерде 180 жолаушы болған.

Соңғы ақпараттарға сәйкес, апатқа ұшыраған украиналық лайнердің бортында болған барлық адам қаза тапты. Ұшақ "Украина халықаралық әуе жолдары" әуекомпаниясына тиесілі.

Ал, Иранның шұғыл медициналық көмек көрсету қызметінің басшысы Пирхоссейн Куливанд Куливанд IRINN мемлекеттік ақпарат агенттігіне берген сұхбатында апат болған аймаққа жедел жәрдем бригадалары жіберілгенін, алайда олар зардап шеккендерге жақындай алмағанын, өйткені онда ұшақ бөлшектері жанып жатқанын хабарлаған.

Ұшақ апатына байланысты Украина Президенті Владимир Зеленский әлеуметтік желідегі парақшасында пікір білдірді.

"Таяу Шығыстан суыт хабар келді. Бүгін Имам Хомейни (Тегеран қаласы) халықаралық әуежайынан ұшқан "Украина халықаралық әуе жолы" әуе компаниясының жолаушылар ұшағы әуежай маңында апатқа ұшырады. Алдын ала мәлімет бойынша, барлық жолаушы мен экипаж мүшелері қаза тапқан. Біздің елшілік болған оқиға жайлы және қаза тапқандар туралы мәліметті анықтап жатыр. Қаза тапқандардың отбасына қайғырып көңіл айтамын", - деп жазды Зеленский Facebook желісіндегі парақшасында. 

Abai.kz