Қазақстанның Қаржы министрлігі, қаржы мониторингі комитеті төрағасының орынбасары Ғабит Лесбеков елімізден 27 триллион теңге шетелге шығарылғанын айтыпты.

Лесбековтің мәліметінше, 27 триллион теңгенің шамамен 10 триллионы Ұлыбритания мен Ресейге аударылған.

- Қазіргі таңда базамыздағы мәліметке сәйкес, бізге 1 миллион 643 мың 320 хабарлама түсті. Нәтижесінде жалпы сомасы 27 триллион теңге елден шығарылған. Бұл ақшаның 80 пайызы 5 елге: Ұлыбритания, Ресей, Қытай, Швейцария, АҚШ-қа аударылған. Ал Ұлыбритания, Ресей бірінші орында тұр. Бұл мемлекеттерге 27 триллион теңгенің шамамен 10 триллион теңгесі аударылған,- депті Ғабит Лесбеков.

Ал, өткен аптада LS сайты 2019 жылы Қазақстаннан 655 млрд. теңгеден астам қаражат сыртқа шығарылғанын жазды.

LS мәліметінше, Қазақстанның шет елдерге жіберген ақшасы бір жыл ішінде 9%-ға өскен. Ал, ақшаның басым бөлігі Ресей мен Өзбекстанға аударылған көрінеді.

Ұлттық банк бұл аударымның 2018 жылмен салыстырғанда 8,8 пайызға көп екенін айтты.

2019 жылы Қазақстан қай елдерге қанша қаражат аударды?

Ресейге - 208 миллиард.теңге

Өзбекстанға - 139 миллиард.теңге

Түркияға - 93,4 миллиард.теңге

Қырғызстан -87,2 миллиард.теңге.

Қытайға 35,5 - миллиард теңге

Украинаға - 10,7 миллиард теңге

Арменияға - 9,4 миллиард теңге аударылған.

Сонымен бірге, 2019 жылы Қазақстанға басқа елдерден 342 миллиард теңгеден астам қаражат келген.

Abai.kz