Кинотеатр - өркениетті өмірдің бір бөлігі. Оның үстіне жаппай жұртшылық жиналатын қоғамдық орын. Баршаңызға белгілі, 17-тамыздан бастап карантин шаралары біртіндеп жеңілдетілуде. Әзірше, кинотеатрлар мен тойханаларға кезек келген жоқ. Аталған бизнес субьектілердегі жұртшылықтың наразылық білдіруі заңдылық. Осыған қатысты қысқаша түсініктеме.

Біз әуелі мына жағдайға назар аударғанымыз абзал. Адам баласының күнделікті өміріне бірінші кезекте не керек? Әрине, әуелі азық-түлік. Онсыз өмір сүру мүмкін емес. Сол үшін карантин уақытында дүкендердің жұмысы тоқтаған жоқ. Екіншіден, карантин шаралары жеңілдетілген кезде қоғамдық тамақтану орындарына рұқсат етілді. Яғни, адамдардың азықтануы қашан да бірінші орынға қойылады.

Үшiншiден, қоңыр күз бен жаңа оқу маусымы келіп қалды. Ескіні ауыстыратын немесе жаңадан маусымдық жылы киім алатын кездің бірі осы. Сол себепті киім-кешек сататын орындардың жұмысына рұқсат берілді.
Азаматтар үшін ең басты қажеттіліктер ескерілуде. Азық-түлік, киім-кешек және қатынас. Осы ретте ұшақтар мен жолаушылар пойызы туралы айтсам. Баршаңызға мәлім жолаушылар тасымалында карантин кезінде көптеген шектеулер болды. Тіпті бір кездері барлық бағыттағы қатынас тоқтағанын білесіздер. Жағдайы тұрақталған уақытта ұшақтың ұшуына, пойыздың жүруіне рұқсат етілді. Өмір болған соң әртүрлі жағдай болады. Сол себепті азаматтардың жүріп-тұруына жағдай жасалды.
Ескеретін жәйт, жоғарыда аталған барлық жағдайда қауіпсіздік қатаң талап етілді. Егер байқасаңыздар, барлық жерде бетперде мен антисептик сұралады. Оны орындамаған мекемелер жұмыс істей алмайды.

Бағдат Қожахметовтың жазбасы

Abai.kz