كينوتەاتر - وركەنيەتتى ءومىردىڭ ءبىر بولىگى. ونىڭ ۇستىنە جاپپاي جۇرتشىلىق جينالاتىن قوعامدىق ورىن. بارشاڭىزعا بەلگىلى، 17-تامىزدان باستاپ كارانتين شارالارى بىرتىندەپ جەڭىلدەتىلۋدە. ازىرشە، كينوتەاترلار مەن تويحانالارعا كەزەك كەلگەن جوق. اتالعان بيزنەس سۋبەكتىلەردەگى جۇرتشىلىقتىڭ نارازىلىق ءبىلدىرۋى زاڭدىلىق. وسىعان قاتىستى قىسقاشا تۇسىنىكتەمە.

ءبىز اۋەلى مىنا جاعدايعا نازار اۋدارعانىمىز ابزال. ادام بالاسىنىڭ كۇندەلىكتى ومىرىنە ءبىرىنشى كەزەكتە نە كەرەك؟ ارينە، اۋەلى ازىق-تۇلىك. ونسىز ءومىر ءسۇرۋ مۇمكىن ەمەس. سول ءۇشىن كارانتين ۋاقىتىندا دۇكەندەردىڭ جۇمىسى توقتاعان جوق. ەكىنشىدەن، كارانتين شارالارى جەڭىلدەتىلگەن كەزدە قوعامدىق تاماقتانۋ ورىندارىنا رۇقسات ەتىلدى. ياعني، ادامداردىڭ ازىقتانۋى قاشان دا ءبىرىنشى ورىنعا قويىلادى.

ۇشiنشiدەن، قوڭىر كۇز بەن جاڭا وقۋ ماۋسىمى كەلىپ قالدى. ەسكىنى اۋىستىراتىن نەمەسە جاڭادان ماۋسىمدىق جىلى كيىم الاتىن كەزدىڭ ءبىرى وسى. سول سەبەپتى كيىم-كەشەك ساتاتىن ورىنداردىڭ جۇمىسىنا رۇقسات بەرىلدى.
ازاماتتار ءۇشىن ەڭ باستى قاجەتتىلىكتەر ەسكەرىلۋدە. ازىق-تۇلىك، كيىم-كەشەك جانە قاتىناس. وسى رەتتە ۇشاقتار مەن جولاۋشىلار پويىزى تۋرالى ايتسام. بارشاڭىزعا ءمالىم جولاۋشىلار تاسىمالىندا كارانتين كەزىندە كوپتەگەن شەكتەۋلەر بولدى. ءتىپتى ءبىر كەزدەرى بارلىق باعىتتاعى قاتىناس توقتاعانىن بىلەسىزدەر. جاعدايى تۇراقتالعان ۋاقىتتا ۇشاقتىڭ ۇشۋىنا، پويىزدىڭ جۇرۋىنە رۇقسات ەتىلدى. ءومىر بولعان سوڭ ءارتۇرلى جاعداي بولادى. سول سەبەپتى ازاماتتاردىڭ ءجۇرىپ-تۇرۋىنا جاعداي جاسالدى.
ەسكەرەتىن ءجايت، جوعارىدا اتالعان بارلىق جاعدايدا قاۋىپسىزدىك قاتاڭ تالاپ ەتىلدى. ەگەر بايقاساڭىزدار، بارلىق جەردە بەتپەردە مەن انتيسەپتيك سۇرالادى. ونى ورىنداماعان مەكەمەلەر جۇمىس ىستەي المايدى.

باعدات قوجاحمەتوۆتىڭ جازباسى

Abai.kz