Қазір көпшілік өз сада­қасын мешіттерге немесе көшеде, базарда қайыр сұрап тұрғандарға, болмаса әлеуметтік жағдайы төмен өзінің көршісіне апарып беріп жатады. Тіпті біреулер жетімдер мен қарттар үйіне қайырымдылық шарасын өткізеді. Алайда бізде әлеуметтік жағдайы төмен адамдар тым көп. Тіпті олардың ішінде сол мешіт­ке, базарға барып қайыр сұрауға өз аяғымен жете алмай көмекке зәру болып отырғандар да баршылық. Көбіне олар осылайша әлеу­меттік көмектен шет қа­лып қояды. Онымен қоса, кей­біреулер бір жетімдер үйі­не үйіп-төгіп жағдай жа­сайды да, ал келесі бір бала­лар үйі мұндай көмек­тен тыс қалып қойып жата­ды. Сондықтан қайырым­ды­лық жасайтындарға арнап арнайы қоғамдық қор құру арқылы әлеуметтік жағдайы төмен адамдар­дың барлығына бірдей көмек қолын созсақ, дұрыс болар еді.

Мұның барлығын қоғамдық қор құру арқылы реттеп отырғанымыз дұрыс шы­ғар. Мәселен, қордың құрылтайшылары қатарына елім деп еңіреген, ұлт тағдырына қабырғасы қайысқан тұлғалар - зиялы қауым өкілдері, кәсіпкерлер, ел басқарушы азаматтар кіріп, жергілікті әкімдікпен бір­лесе отырып, барлық қарттар мен балалар үй­лерінің, әлеуметтік жағдайы төмен отба­сы­лардың тізімін алып, шын мәнінде көмек­ке мұқтаж жандарға қайырымдылық көмек көрсетіп отырсақ әлдеқайда сауапты іс болар еді. Бір жағынан, мұндай қор құрыл­са, ол ақша кімдерге, қай уақытта қанша бөлініп жатқанына дейін банктік шот арқылы бақылап отыруға мүмкіндік алар едік. Тіпті біреулер науқас баласын емдетуге қаржы таппай жүрсе, 7-8 баламен баспанасыз жүрген жалғызбасты аналар болса, баспанаға шын мұқтаж жан­дарды сараптап, солардың жағдайын жер­гілікті билікке жеткізіп, көмектесуіне ықпал жасаса, нұр үстіне нұр емес пе? Қоғамдық қор көмекке зәру адамдардың мұң-мұқ­тажын жергілікті билікке, Денсаулық сақ­тау, Еңбек және халықты әлеуметтік қорғау, Білім және ғылым секілді түрлі министр­ліктерге жеткізе отырып жүзеге асырса қандай тамаша болар еді?!

Жанболат ИБРАГИМОВ, Түркістан қаласы әкімінің орынбасары:

- Түркістан қаласында қайырым­дылық шаралары жиі өткізіліп тұрады. Өткен жылы ғана қаланың жомарт аза­мат­тарын тарту арқылы әлеуметтік жағ­дайы төмен, үй кезегінде тұрған 12 отбасыға коммуналдық тұрғын үйдің кіл­тін табыстадық. Сондай-ақ ел Тәуел­сіз­дігінің 20 жылдық мерейтойы қар­саңында бизнестің жауапкершілігі ая­сында мүгедектерге арналып салынған екі қабатты 16 пәтерді пайдалануға бер­дік. Қала әкімі Қайрат Құсейінұлы қол­дан келгенше қайырымдылық ша­ра­ларды жиі өткізуге тырысады. Әркез демеушілер есебінен акциялар ұйым­дастырып, мүмкіндік болғанша әлеу­меттік аз қамтылғандарға көмек көр­сету­ге ұйытқы болып жүр. Әрине, елге жанашыр азаматтар өз тарапынан қаладан қоғамдық қор құрып, демеуші тауып, ел игілігі үшін жұмыстар атқарса, оған біз қуанамыз.

Камал БҰРХАНОВ, Мәжіліс депутаты:

- Әрине, мемлекет әлеуметтік аз қам­тылғандарға, жағдайы төмен отба­сы­ларға мүмкіндігінше көмектесіп-ақ жа­тыр. Десек те, бүгінгі таңда бізде бай адам­дар көп. Тіпті кейбіреулері ай са­йын қымбат көлігін ауыстырып жатады. Бұл жерде, біріншіден, байлардың жағ­дайы төмен отбасыларға көмек қо­лын созып, қайырымдылық жасаса, оның сауабы көп болатынын жан-жақты тү­сін­діруіміз керек. Қайырымдылық ак­цияларына қаржы бөлген кәсіпкерлерді БАҚ құралдарында насихаттап, басқа­ларға үлгі ретінде көрсетуіміз керек. Бұл жерде кәсіпкерді жарнамалау емес, тек басқа кәсіпкерлерге ой салатындай етіп жазсақ жақсы болар еді. Мәселен, шетелдік тәжірибені қарап отырсақ, онда бай-манаптар ғана емес, тұрмыс жағдайы орташа азаматтар да арбамен базардан азық-түлікті толтырып алып, мұқтаж адамдарға тегін таратып береді. Біз де осы жүйені қоғамдық қор құру арқылы енгізуімізге болады. Мәселен, қазір әрбір үйде ескірген, кимейтін киімдер үйіліп жатыр. Неге оларды үкі­меттік емес ұйымдар арқылы мұқтаж адам­­дарға таратып бермеске? Сон­дық­тан облыс-қалаларда осындай қоғам­дық қорлар құрылып, олар әкімдікпен бірігіп жұмыс істеп, демеушілер тартып мұқтаж жандарға көмектессе, олардың жұмыстарын жергілікті жұмыспен қамту және әлеуметтік қолдау бөлімдері қада­ғалап отырса жақсы-ақ болар еді.

Серік ЖҰМАБАЕВ

«Алаш айнасы» газеті