Түркіменстанда карантиндік шектеулерді азайту бойынша қаулы өз күшіне енді. Елдегі вирус жұқтыру фактілері көбейгеніне қарамастан Ашхабад осындай шешім қабылдап отыр. Коронавирус Түркіменстанда ресми түрде мойындалған емес, бірақ карантиндік шектеулер бар.  

Бір жылдық үзілістен кейін ел ішіндегі теміржол және автобус байлыныстары қайта іске қосылды. Қонақ үйлер келушілерді қабылдап жатыр. "Коронавирус жоқ" деген билік карантиндік шектеулерді не себеппен енгізгенін айтпаған еді, енді карантиндік шектеулерді азайтудың себебін де жарияламады.

1 сәуірден бастап Авазадағы қонақ үйлер де келушілерді қабылдауды бастады. Қонақ үйде орналасу үшін COVID-19 анықталмағаны жайлы анықтама көрсетсеңіз жеткілікті. Елдегі жағдайдың нашарлағанына қарамастан, қонақ үй бағалары 35%-ға артқан.

Карантиндік шектеулерді азайтқан Түркіменстан билігі халықты вакцинациялауды бастайды. Елде вирустың барын мойындамаған түркімен билігі бұл әрекетіне де ресми жауап бермеді.

Abai.kz