Мемлекеттік тілдің мүшкіл халін айта-айта жақ талды, өрескел қателіктер туралы ақпаратты ести-ести құлақ тұнды. Бірақ әлі күнге туған тіл тұғырына қона алмай тұр.

Күнделікті тұтыну тауар­ларының қо­рапшаларындағы қазақ тіліндегі жаз­баларды көріп, жағаңды ұстайсың. Тауар өндіруші компаниялардың жіберген өрескел қателіктері еріксіз езуіңізге күлкі үйіреді. «Синегорья сүті» Көкшетау сүт зауыты» жауапкершілігі шектеулі се­ріктестігінің өнімін тұтынбайтын халық кемде-кем шығар. «Одари» тауар белгісімен шығарылатын сүт өнімдерінің дәмі тіл үйіреді. Әйтсе де, өнім қорапшаларының сыртындағы қателіктер тілдің абыройын айрандай төгіп отыр.
«Одари» сүтінің қорап­шасындағы қателіктерді тіз­бектеп көрелік. «Молоко шоу» атты шараның аясында сүт өнімін тұтынушылар арнайы жүлделерге ие бо­лады екен. «Молоко шоу» акцияның өт­кізілу уақыты - 01.11.11. бастап, 30.04.12 дейін. Жүлде беру мерзілі - 01.11.11. бастап 31.07.12 дейін. Осы сайттарда акция шарт­тары туралы толық ақ­паратты тауып ала­сыз» делінген қорапшада. Мемлекеттік тілде жіберілген қателерді үшінші сынып­тың оқушысы-ақ бірден аңғарады.
«Сау сиырдан жаңа сауыл­ған сүт алғашқы 2 сағатта өте пайдалы! Біздерге, қала тұр­ғындарына, мұндай сүт қол­жетімді емес, құйылып бері­летін сүт бізге бірнешге сағат өтекеннен кейін жетеді. Осы уақытта онда денсаулыққа қауіпті ауру жұқтыратын бактериялар дамып жатады» дейді сүт өндірушілері. Шұ­балаңқы сөйлемнің орысша нұсқасынан ұққанымыз, сауылған сүт тек алғашқы екі сағатта ғана пайдалы екен. Ал қала тұрғындарына құйылмалы сүт бірнеше сағаттан соң жет­кізіледі. Бұл уақытта сүтте ден­саулыққа зиянды бактериялар пайда болуы мүмкін. «Енді не істеу керек?» деген сөйлемді, «Синегорья» компаниясы «Қа­лай болу керек?» деп аударған. Сонымен, «Сүттің максимальді пайдасы ультрапастерлендіру әдісі арқасында сақталады. Бұл сүттің пайдалы қасиетін сақтап қалатын және толығымен бектериядан тазалайтын өңдеу» екен. Ал түсініп көріңіз...
«Одари» сүтінің 5 артық­шылығының бірі ретінде, са­пасына барлық өндіріс жұ­мыстары кезінде қатаң бақылау қойылады делінген. Өнім са­пасын бақылаушылар қо­рапша сыртындағы қателіктерді ба­қылауға алмады немесе тіптен сүт өндіру зауытында қазақ тілін білетін маман тап­шы болса керек.
Айтпақшы, арнайы шараны жарнамалап тұрған Ресей актері Иван Ургант «Вот бережный подход!» деген орыс тіліндегі сөйлемді «Міне, құнтты тұрғы!» деп қазақ тіліне тәржімалаған.

Әйгерім Бақытқызы