Бүгін Қарағанды облыстық «Әнет баба» мешітінде қайырымдылық шарасы өтіп, «Ел үлесі – пәтерге» жобасы бойынша бір сәтте 10 баспананың кілті табысталды.

Игі шараға арнайы қатысқан Бас мүфти Наурызбай қажы Тағанұлы Діни басқарманың негізгі жұмыс бағыттарының бірі қайырымдылық, көмек сұрап келгенге көмектесу екенін атап өтті.

«Дінімізде тозаңның салмағындай жақсылық жасасаң да, қайырымын көресің дейді. Тозаңның салмағын өлшеп көрдіңіз бе? Оның өлшемін, оның қайтарымын Алла Тағала ғана біледі. Біздің бұл жердегі шынайы ниетіміз сақталуы керек. Бүгінге дейін «Зекет және қайырымдылық» қорының ұйымдастыруымен 400-ден аса пәтер берілді. Бұл – үлкен көрсеткіш. Осынша отбасыға қуаныш сыйлап, үй-жайлы болуына ықпал еттік. Міне, бүгін осында келген мұқтаж отбасылар тағы да қуанышқа кенеледі. Біз үшін одан асқан бақыт жоқ. Алла Тағала баршамызды осындай шат-шадыман сәттерімізден айырмасын» деді ҚМДБ Төрағасы.

Бүгінгі баспана беру рәсімінде Қарағанды облысы бойынша көпбалалы бірнеше отбасы, ауыл имамы және баспанаға мұқтаж өзге ұлт өкілі бар.

Abai.kz