Қазақтың бес арысының бірі – Мағжан Жұмабаев «Алты Алаштың баласы бас қосса, төр мұғалімдікі» деген екен. Мемлекеттің келешегі болар жас ұрпақты тәрбиелеп, білім нәрімен сусындатқан ұстаздардың мойнына артылар жүк ауыр. Мұғалімнің бір міндеті білгенімен бөлісу болса, екінші міндеті әрдайым көшбасшылық қырын шыңдап, педагогикалық білімін жетілдіріп, замана ағымынан қалмай жүру. Бүгін Алматы ұстаздарына сол міндетті іске асырудың жаңа мүмкіндігі ашылды. Қаланың жас, жаңалыққа жаны құмар мұғалімдері үшін «Алматы ұстазы» байқауы жарияланды.

Алматыдағы жалпы білім беретін мектептерде жұмыс істеп жүрген мұғалімдер конкурсқа қатысып, 5 000 000 теңге бас жүлдені ұтып ала алады. Ал жарыстың финалдық кезеңіне шыққан бес педагог Финляндия елінің әлемдік қауымдастық мойындаған білім беру мекемелерінен тағылымдамадан өтуге мүмкіндік алады.

Жарыстың негізгі мақсаты – қаладағы мемлекеттік жалпы білім беретін мектептердің деңгейін арттыру. Конкурсты ұйымдастырушылардың айтуынша, Алматы озық білім беру технологияларының орталығы болуға дайындалу үстінде, мұғалімдерді инновацияларды батыл пайдалануға және балаларға жақын болу үшін заманауи контент жасауға шақырады.

"Мұғалім оқушыларды шабыттандырып, жетістікке жетелей білуі керек. Биылғы оқу жылында қалада 32 мыңнан астам бүлдіршін бірінші сыныпқа аяқ басты. Бұл өткен жылмен салыстырғанда 1000 мың оқушыға артық. Қалада 210 мемлекеттік мектеп пен 91 жеке мектеп жұмыс істейді. «Алматы ұстазы» байқауы үздік халықаралық спикерлердің кәсіби цифрлық  тәжірибесін беріп қана қоймай, қалыптасқан білім беру жүйесіндегі оқыту әдісіне өзінің жаңашыл көзқарасын әкелетін заманауи әрі құзыретті педагогтардың қауымдастығын құруға жетелейді»,-дейді Алматы қаласы білім басқармасының басшысы Ләззат Әуесханқызы Жылқыбаева.

Байқауда бақ сынауға Алматының 36 жасқа дейінгі мемлекеттік білім беру ұйымдарында оқу жоспарының барлық пәндері бойынша 1-12 сынып мұғалімдері қатыса алады. Ол үшін алдымен қарапайым үш шартты орындауы керек. Біріншісі, электрондық тіркеуден өтіп, сауалнаманы толтыру; екіншісі, жұмыс өтілі көрсетілген жұмыс орнынан анықтаманың түйіндемесін, фотосуретін, сканер-көшірмесін жүктеу; үшіншісі, академиялық адалдық ережелерін сақтау.

Жарыс үш кезеңнен тұрады. Бірінші кезеңде, "Менің оқыту философиям" тақырыбында мультимедиялық мақала әзірлеу; екінші кезеңде, "Кәсіби мұғалім" конкурстық сабағын өткізу; үшінші кезеңде, өзінің педагогикалық тәжірибесі мен шеберлігін көрсететін «Мен көшбасшы ұстазбын»тақырыбында авторлық шеберлік сабақтарын өткізуі керек.

Байқаудың өту барысында мұғалімдер білім беру саласындағы халықаралық спикер-көшбасшылардың вебинарлары мен мастер-кластарына қатысады. Олардың ішінде, АҚШ-тың білім берудегі ең ірі ISTE цифрлық компаниясының директоры Ричард Кулата; Эстониялық білім беру технологы, блогер, мұғалімдер жаттықтырушысы Людмила Рождественская, химия пәнінің мұғалімі, әдіскер-жаттықтырушы, Digital Ustaz Almaty байқауының финалисі Базарқызы Бұлсайран; тарих пәнінің мұғалімі, Digital Ustas Almaty байқауының жеңімпазы, тарих оқулықтарының авторы, Халықаралық емтихан алушы Сағынғали Қалиев; директордың оқу-әдістемелік жұмысы жөніндегі орынбасары, Instagram, Telegram және YouTube-тағы "Будни завуча" арналарының авторы Алина Әлімбаева; Назарбаев Зияткерлік мектебі информатика пәнінің мұғалімі, Даниядағы STEM Teacher AwardWinner 2017 халықаралық сыйлығының жеңімпазы, STEM сарапшысы, инклюзивті білім беру бойынша сертификатталған жаттықтырушы Мақпал Мұқанова болады.

Конкурсқа қатысуға өтінімдерді қабылдау 1 тамызда басталған. Ол 11 қыркүйекте сағат 23:59-да аяқталады.

Мұндай ауқымды байқау жас ұстаздың білім көкжиегін кеңейтіп қана қоймай, мамандығына деген сүйіспеншілігін одан әрі арттыратыны сөзсіз.

Былтыр да Алматы қаласында педагогтардың кәсіби шеберлік деңгейін жақсартуға бағытталған Digital Ustaz Almaty сайысы өткен болатын. Байқау мектептегі оқытуды цифрландыруды насихаттауға және Алматы қаласының үздік digital-мұғалімдерін анықтауға арналды. Нәтижесінде Galaxy International School гуманитарлық ғылымдар кафедрасының меңгерушісі, тарих пәнінің мұғалімі Сағынғали Қалиев жеңімпаз атанды.

Назарбаев Зияткерлік мектептерінің баспасына арналған 9 және 10 сыныптардың дүниежүзілік тарих оқулықтарының авторы, халықаралық білім беру жүйелері International Baccalaureate Organization және Cambridge International Examinations – A-Levels-тің емтихан алушысы Сағынғали Қалиев Digital Ustaz Almaty конкурсының жеңімпазы ретінде Лондон қаласына тәжірибе алмасуға барып келді.

«Алматы мектептері бүгінгі күннің ғана емес, ертеңгі күннің де ең жоғары талаптарына сай болуы тиіс. Бұл үшін көп жұмыс атқарылуда. Мәселен, биыл біз 150 мектепті қамти отырып, "Алматы мектептері" 3 жылдық бағдарламасын іске қостық, оның қорытындысы бойынша 450 басқарушы қайта кәсіби даярлаудан өтеді, 15 000-нан астам педагог өз біліктілігін арттырады. "Алматы мектептері" бағдарламасында Digital Ustaz Almaty цифрлық құзыреттілік саласында жыл сайын кәсіби педагогикалық шеберлік конкурсын өткізу көзделген. Сондай-ақ, 3 мыңнан астам дайындық қарастырылған. IT мамандықтары бойынша жоғары сынып оқушылары, Біз қаланың барлық мектептеріне цифрлық ресурстарға қол жеткізуге мүмкіндік береміз. Мұның бәрі педагог мәртебесін арттыруға, мұғалім мамандығын жастар үшін тартымды етуге және біздің білім беру ұйымдарындағы кадр тапшылығын қысқартуға мүмкіндік береді. Білім беру мазмұнын жаңарту және дамыту мәселесі инфрақұрылым мен материалдық-техникалық қамтамасыз ету мәселесіндей маңызды деп санаймыз. Сондықтан біз мұғалімдердің прогрессивті жұмыс дағдысын қолдаймыз және дамытамыз»,-деді Сағынғали Қалиев.

Ұлт болашағы, халқымыздың келешегі ұстаздардың еңбегімен тікелей байланысты. Егеменді елімізді әлемге танытуда жолдың бастауында мектеп тұр десек, сол мектептің жүрегі – мұғалім. Жаһандану заманында бәсекеге қабілетті болу үшін білім саласында көш бастап тұру басты міндет.

Abai.kz