Қазақстандық заңгер Ольга Чернова instagram парақшасында ҚР Денсаулық сақтау министрі Ажар Ғинияттың отставкаға кетуін талап етті. Ол Президентке видеоүндеу жолдады.

«Құрметті Қазақстан Республикасының президенті Қасым-Жомарт Кемелұлы, мен осы елдің азаматы ретінде өз атымнан және Денсаулық сақтау министрі Ажар Ғиниятқа сенімін жоғалтып, көңілі толмайтынын білдіріп жатқан оқырмандарымның атынан, оның отставкаға кетуін талап етемін»,-деді заңгер.

Жақында дәрігерлердің кәсіби міндеттеріне немқұрайлы қарағанының кесірінен 42 баланың зардап шеккеніне куә болдық. Ал Ажар Ғиният болса, медицина қызметкерлеріне тағылатын қылмыстық жазаны азайтуға, жеңілдетуге тырысып бағуда»,-деді ол.

Заңгер елімізде дәрігерлік қателіктен көптеген адамның өмірі қиылып жатқанын еске салды.

«Денсаулық сақтау деңгейі мен сапасының төмендеуі еліміздің ұлттық қауіпсіздігіне төнетін 20 қатердің төртіншісі екенін айтқым келеді. Біз күнде дәрігерлердің қателігінен қаншама адамның өмірден өтіп жатқанын, азаматтардың денсаулығына зиян келіп жатқанын көріп жүрміз. Сондықтан мен министрдің орнынан кетуін қарастыруды сұраймын!

Бұлай жалғастыра беруге болмайды. Бәрін Ажар Ғинияттың Денсаулық сақтау реформасынан бастау керек»,- деді Ольга Чернова.

Ол сондай-ақ Жамбыл облысында қан алғаннан кейін үш айлық қыздың шетінегені туралы айтты.

"Мен бұл істі объективті түрде тергеуді талап етемін. Сотқа дейінгі тергеу әдеттегідей созбаққа салынып, кінәлілер тағы да жазадан сытылып кетпеуі керек. Сіз тіпті қылмыстық жауапкершілікке тарту статистикасын көрдіңіз бе?! 5 жыл ішінде 83 адамның 27-сі жауапқа тарту мерзімінің өтіп кетуіне байланысты жазасыз қалған. Менің ойымша, бұл кәдімгі геноцид. Адамдар өліп жатыр және ол үшін ешкім жауап бермейді. Біз өз елімізде қалай қорықпай емделе аламыз?! Медицинамызды ретке келтіруді тағы қанша адам өтінуі керек? Неліктен сіздер халықтың үнін естігілеріңіз келмейді?",- деді заңгер.

Айта кетейік, Ажар Ғиният Қазақстанның денсаулық сақтау министрі қызметіне 2022 жылғы 11 қаңтарда тағайындалды.

Abai.kz