قازاقستاندىق زاڭگەر ولگا چەرنوۆا instagram پاراقشاسىندا قر دەنساۋلىق ساقتاۋ ءمينيسترى اجار عينياتتىڭ وتستاۆكاعا كەتۋىن تالاپ ەتتى. ول پرەزيدەنتكە ۆيدەوۇندەۋ جولدادى.

«قۇرمەتتى قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى، مەن وسى ەلدىڭ ازاماتى رەتىندە ءوز اتىمنان جانە دەنساۋلىق ساقتاۋ ءمينيسترى اجار عينياتقا سەنىمىن جوعالتىپ، كوڭىلى تولمايتىنىن ءبىلدىرىپ جاتقان وقىرماندارىمنىڭ اتىنان، ونىڭ وتستاۆكاعا كەتۋىن تالاپ ەتەمىن»،-دەدى زاڭگەر.

جاقىندا دارىگەرلەردىڭ كاسىبي مىندەتتەرىنە نەمقۇرايلى قاراعانىنىڭ كەسىرىنەن 42 بالانىڭ زارداپ شەككەنىنە كۋا بولدىق. ال اجار عينيات بولسا، مەديتسينا قىزمەتكەرلەرىنە تاعىلاتىن قىلمىستىق جازانى ازايتۋعا، جەڭىلدەتۋگە تىرىسىپ باعۋدا»،-دەدى ول.

زاڭگەر ەلىمىزدە دارىگەرلىك قاتەلىكتەن كوپتەگەن ادامنىڭ ءومىرى قيىلىپ جاتقانىن ەسكە سالدى.

«دەنساۋلىق ساقتاۋ دەڭگەيى مەن ساپاسىنىڭ تومەندەۋى ەلىمىزدىڭ ۇلتتىق قاۋىپسىزدىگىنە تونەتىن 20 قاتەردىڭ ءتورتىنشىسى ەكەنىن ايتقىم كەلەدى. ءبىز كۇندە دارىگەرلەردىڭ قاتەلىگىنەن قانشاما ادامنىڭ ومىردەن ءوتىپ جاتقانىن، ازاماتتاردىڭ دەنساۋلىعىنا زيان كەلىپ جاتقانىن كورىپ ءجۇرمىز. سوندىقتان مەن ءمينيستردىڭ ورنىنان كەتۋىن قاراستىرۋدى سۇرايمىن!

بۇلاي جالعاستىرا بەرۋگە بولمايدى. ءبارىن اجار عينياتتىڭ دەنساۋلىق ساقتاۋ رەفورماسىنان باستاۋ كەرەك»،- دەدى ولگا چەرنوۆا.

ول سونداي-اق جامبىل وبلىسىندا قان العاننان كەيىن ءۇش ايلىق قىزدىڭ شەتىنەگەنى تۋرالى ايتتى.

"مەن بۇل ءىستى وبەكتيۆتى تۇردە تەرگەۋدى تالاپ ەتەمىن. سوتقا دەيىنگى تەرگەۋ ادەتتەگىدەي سوزباققا سالىنىپ، كىنالىلەر تاعى دا جازادان سىتىلىپ كەتپەۋى كەرەك. ءسىز ءتىپتى قىلمىستىق جاۋاپكەرشىلىككە تارتۋ ستاتيستيكاسىن كوردىڭىز بە؟! 5 جىل ىشىندە 83 ادامنىڭ 27-ءسى جاۋاپقا تارتۋ مەرزىمىنىڭ ءوتىپ كەتۋىنە بايلانىستى جازاسىز قالعان. مەنىڭ ويىمشا، بۇل كادىمگى گەنوتسيد. ادامدار ءولىپ جاتىر جانە ول ءۇشىن ەشكىم جاۋاپ بەرمەيدى. ءبىز ءوز ەلىمىزدە قالاي قورىقپاي ەمدەلە الامىز؟! مەديتسينامىزدى رەتكە كەلتىرۋدى تاعى قانشا ادام ءوتىنۋى كەرەك؟ نەلىكتەن سىزدەر حالىقتىڭ ءۇنىن ەستىگىلەرىڭىز كەلمەيدى؟",- دەدى زاڭگەر.

ايتا كەتەيىك، اجار عينيات قازاقستاننىڭ دەنساۋلىق ساقتاۋ ءمينيسترى قىزمەتىنە 2022 جىلعى 11 قاڭتاردا تاعايىندالدى.

Abai.kz