Алматы қаласының №2 Бостандық аудандық соты тіркелмеген Демократиялық партияның (ҚДП) көшбасшысы, қазір үйқамақта отырған  Жанболат Мамайдың Ұлыбритания азаматтарымен кездесуі туралы өтінішін қабылдамады, деп хабарлады Алматы қалалық сотының баспасөз қызметі.

"2023 жылдың 12 қаңтарында сотқа сотталушы Мамайға Ұлыбританияның үш азаматымен кездесуге рұқсат сұрау туралы өтініш түсті. ҚІЖК-нің 99, 362-баптарына сәйкес өтінішхат сот отырысында қаралды. Сот тараптардың пікірін тыңдап, өтінішті келесі негіздер бойынша қанағаттандырудан бас тартты. Сотталушы Мамай үй қамауында және ҚІЖК-нің 146-бабына сәйкес белгілі бір шектеулерді сақтауға міндетті. Шектеулердің бірі – жақын туыстары мен адвокаттан басқа адамдармен келіссөздер жүргізуге және сөйлесуге тыйым салу. Өтініште көрсетілген Ұлыбритания азаматтары сотталушының адвокаттары немесе құқық қорғау ұйымдарының мүшелері емес", - делінген хабарламада.

Бұған дейін Қазақстан Сыртқы істер министрлігінің ресми өкілі Айбек Смадияров Қазақстанға келген Британдық парламенттік комиссияның ресми мәртебесі жоқ екенін айтқан болатын.

Abai.kz