Екібастұз ЖЭО-да апат болып, тұрғындар тағы да жылусыз қалды.

«18 ақпанға қараған түні сағат 4:55-те станцияда желілік су құбырының тығыны ашылып кеткен. Желілік су құбырын жөндеу үшін № 12, 13, 15 қазандық агрегаттары, желілік сорғылар жұмысы тоқтатылды», - деп хабарлады сенбіде «Екібастұзжылуэнерго» ЖШС.

Кәсіпорынның № 5, 6, 9 энергетикалық қазандық агрегаты жұмыс істеп тұрған, бірақ жылу төмендетілген.

Кәсіпорын түнгі 12-ге дейін зақымдалған учаске қалпына келтіріліп, жылу беріледі деп отыр.

Естеріңізге сала кетейік, 2022 жылғы 27 қарашада Павлодар облысындағы Екібастұз ЖЭО-да апат болып, халық 30 градустық аязда жылусыз қалған болатын. Бұған дейін де осындай апат болған. Нысанды олигарх Александр Клебанов басқарады. 28 қарашада Екібастұзда төтенше жағдай режимі енгізілді. Сол күні президент Қасым-Жомарт Тоқаев «мәселесі бар» энергетикалық активтерді мемлекет меншігіне қайтаруды тапсырды. Апат бойынша ЖЭО-да тергеу басталып, қылмыстық іс қозғалды.

Abai.kz