Мәжілістегі Үкімет сағатында Аграрлық мәселелер комитетінің төрағасы Серік Егізбаев ауыл шаруашылығындағы субсидия беру ережесін кемінде 5 жыл бойы өзгермейтіндей етіп бекітуді ұсынды. 

«Саланың шешімін таппай отырған мәселесінің бірі – қаржы институттарының несиесін кепілмен қамтамасыз ету. Мысалы, Агрокредит корпорациясынан «Агробизнес» бағдарламасы бойынша төртінші буындағы 1 гектар жылыжай кешенін салуға 1 млрд теңге несие алу үшін 1 млрд теңге кепіл ұсыну қажет. Фермерлердің жұмыс істегісі келгенімен, қаржыгерлер цифрларды «ойнатып», олардың жұмыс істеуіне мүмкіндік бермей отыр», - деді Мәжілістің комитет төрағасы.

Оның пайымынша, фермерлерге несие беру шарттары мен кепілмен қамтамасыз ету талаптарын түбегейлі қайта қарау қажет.

«Министрлік басшылығы 2021 жылғы қыркүйектен бүгінгі күнге дейін ғана субсидия беруге қатысты бұйрықтарды 21 мәрте өзгертті. Ағылшын тілінде айтқанда, no comment. Субсидия беру жөніндегі мемлекеттік саясат әрбір жарты жыл сайын өзгеретін болса, фермерлер өз жұмысын қалай жоспарлауы керек? Министрлікке субсидия берудің тұрақты және түсінікті ережелерін белгілеу және оны кемінде 5 жылға дейін өзгертпеу қажет», - деді депутат.

Коллаж: ғаламтордан

Abai.kz