Қазақстандағы уақыт белдеуі бір сағат кері шегінуімен халық арасында соңғы уақыттары мәселе туындады. Мәселен жұмыстан қайтушылар тым қараңғыда қайттық десе, енді бір бөлігі түнде таң атып тұрғандай, ұйықтауға қолайсыз деп, т.б шағымдана бастады.

Еңбек және халықты әлеуметтік қорғау министрі Светлана Жақыпова Үкіметте өткен брифингте елімізде бірыңғай уақыт белдеуіне көшуге байланысты жұмыс уақыты өзгеруі мүмкін екендігін мәлімдеді.

"Бізге көп хат келіп жатыр, біз оларға жауап береміз. Жұмыс беруші мен жұмысшының арасында келісімшарт бар, жұмыс кестесін екі жақ бірге жасайды. Сондықтан қараңғыда жұмыс істемеуі үшін, жұмыс берушімен келісіп, жұмыс кестесін қайта қарай алады. Негізі бұл күрделі сұрақ емес", – деді Светлана Жақыпова.

Сонымен қатар министр жеке және бюджеттік мекемелерге ұсыныс берілгенін айтты.

"Ұсыныс бердік, яғни, жұмыс бір сағатқа ерте басталуы мүмкін. Негізі келісімшарт екіжақты жасалады. Ол Еңбек кодексінде жазылған, заңға сәйкес", – деп толықтырды ведомство басшысы.

Abai.kz