1993 жылдың екінші сәуірі – Қазақстанның әскери теңізшілері үшін ерекше күн. Бұл күні Қазақстан Президентінің Жарлығымен Әскери-теңіз күштері құрылды.

Қарулы күштердің бұл түрі қалыптасу мен дамудың түрлі күрделі әрі даңқты кезеңінен өтті. Бүгінгі таңда елдің Әскери-теңіз күштері мемлекеттің теңіздегі қуаты, сенімді және жоғары технологиялық құрамдас бөлігі болып табылады.

Сурет: gov.kz сайтынан алынды.

Әскери-теңіз күштерінің бөлімшелері мемлекеттік шекараны қорғау, Ақтау, Баутино, Құрық порттарын, жасанды аралдарды, Каспий теңізінің қазақстандық секторындағы құбырлар мен кен орындарын күзету міндеттерін орындайды.

Әскери-теңіз күштері заманауи зымыран-артиллериямен, мина тартқыш корабльдермен, гидрографиялық кемелермен және десанттық катерлермен жабдықталған. Өткен жылы отандық десанттық «Шапшаң» қайығы іске қосылды. Жылдам жүзетін қайық теңізде операциялар жүргізуге, жағалауға десант түсіруге, оларды атыспен қолдауға, медициналық эвакуациялауға және апатқа ұшырағандарға көмек көрсетуге арналған.

Сурет: gov.kz сайтынан алынды.

Корабльдер экипаждарын шетелдегі жетекші әскери оқу орындарында оқыған офицерлер басқарады. Былтыр әскери теңізшілер Италия мен Түркия әскери-теңіз күштерінің корабльдері мен кемелерінде тағылымдамадан өтті. Оларға Үндістанда, Түркияда, Пәкістанда және Оңтүстік Кореяда тілдік курстар ұйымдастырылды.

Әскери теңізшілер өздерінің кәсіби шеберлігі мен әскери-теңіз дағдыларын «Бірлестік» халықаралық оқу-жаттығуында, республикалық оқу-жаттығуларда және Каспий теңізі бойынша жиын-жорықтарда айқын дәлелдеп жүр.

Сурет: gov.kz сайтынан алынды.

Жауынгерлік әзірлікті нығайту, теңіз машығын жетілдіру және озық технологияларды меңгеру міндеттерін орындай жүріп, әскери теңізшілер кәсіби деңгейін, жауынгерлік даярлықты, берік рухты және өз істеріне адалдықты көрсетуде.

Abai.kz