«You Tube» платформасында «Заброшенная Россия» дейтін арна бар. Ресейдің түкпір-түкіпіріндегі елдімекендерді, ауыл-аймақтарды аралап, олардың шынайы тіршілігін суреттейді.

Сол арнаның бір бағдарламасы Украинадан оккупацияланған Донецкі және Луганскі облыстарындағы ауылдарға арналыпты.

Луганскі – Украинаның облысы, Украина жері. Бір арқасы - Украинаның Донецкі, Харьков облыстарымен, екінші шеті - Ресейдің Белгород, Воронеж, Ростов облыстарымен шектесіп жатқан аумақ.

Донецкі – Украина жері. Бір шеті - Украинаның Запорож, Днепропетровскі, Харьков, Луганскі облыстарымен шектессе, екінші шеті - Ресейдің Ростов облысымен шектеседі.

Донецкі – жер көлемі жөнінен Украинаның 11-ші аумағы. Соғысқа дейін (2021 жылы) халық саны 4,1 млн адам деп тіркелген.

Ал Луганскі – жер көлемі жөнінен Украинаның 10-шы аумағы. Соғысқа дейін (2021 жылы) жан саны 2,1 млн адам деп тіркелген.

2014 жылы про-ресейлік күштер бас көтеріп, бүлік шығарған. Сөйтіп әлемде Ресей мен Солтүстік Корей секілді елдерден өзге есті жұрты мойындамаған «Луганскі халықтық Республикасы», «Донецкі халықтық республикасы» дейтін ергежейлі мемлекетсымақтар пайда болған.

2022 жылдың 21 ақпанында Ресей билігі ДХР мен ЛХР-ны тәуелсіз мемлекет деп ресми түрде мойындады. Ал 2022 жылдың 24 ақпанында Ресей Украинаға толық ауқымды соғыс ашты. 2022 жылдың 23-27 қыркүйегінде Луганскі мен Донецкі аумақтарында псевдо-референдум өткізіліп, 30 қыркүйекте президент Путин бұл жерлерді Ресей құрамына қосып алды.

Сөйткен, Луганскі мен Донецкінің қазіргі жұрты: «Бұрынғы күндеріміз жақсы еді», - деп жыларман болып отыр екен.

Аталған бейнематериал ресейлік көзқараста болуы түсінікті. Біздің бұл материалды бөлісудегі мақсатымыз – қазақ қоғамы Ресей ауылдарының қалай күн кешіп жатқанын көре жүрсін, біле жүрсін деген ой.

2018 жылы Ресей президенті Путин «Валдай» дейтін экономикалық форумда: «Агрессор білсін. Бәрібір кек, есенің қайтарылатынын білсін. Ол жер бетінен жоқ болады. Ал біз ше? Біз сол агрессордың құрбанымыз. Біз азапталушы ретінде жұмаққа кіреміз. Ал олар, олар – өледі. Өйткені, олар кешірім сұрап та үлгермейді», - деп сөйлеген еді.

Путин айтқан сол «жұмақты» аңсаған Донецкі мен Луганскі жұрты қазір нағыз тозақта өмір сүріп жатыр десек жаңылмаймыз...

Abai.kz