Президентіміз Қасым-Жомарт Тоқаев «TURKISTAN» газетінің бас редакторы Бауыржан Бабажанұлына берген «Қазақстан жаңғырудың жаңа кезеңіне қадам басты» атты сұхбатында қандастар мәселесіне арнайы тоқталып, «Был­тыр Қазақстанға 16 мыңнан астам қан­дас көшіп келген. Соның ішінде еңбекке жарамды азаматтардың он бес пайы­зы­ның ғана жоғары білімі бар. Сол себепті кө­бі Қазақстандағы әлеуметтік-эко­но­ми­калық ортаға бейімделу барысында қиын­дықтарға тап болады. Олар негі­зінен Алматы облысының халық көп тұратын аудандары мен ауылдарына жә­не Маңғыстау облысының Жаңаөзен қаласына қоныстанған. Орталық және жер­гілікті билік, сондай-ақ, құқық қор­ғау органдары бұл жағдайға назар ау­дару­ға мәжбүр болып отыр.»,-деді.

Әрине, Мемлекет Басшысы қандастарымызға қатысты бұл ақпаратты Сіздерден де алған болуы мүмкін.

Сіздер басқаратын облыстарға қоныс тепкен қандастарымыздың Қазақстандағы әлеуметтік-эко­но­ми­калық ортаға бейімделу барысында қиын­дықтарға тап болағаны туралы бұл жағдайға Орталық және жер­гілікті билік, сондай-ақ, құқық қор­ғау органдары ғана емес, екі Президенттің де осы Ұлы көш атты Ұлы бастамасын өмір бойы қолдап келе жатқан азамат, Көші-қон үрдісін реттеуге арналған құқықтық актілерге елеулі өзгертулер мен толықтырулар енуіне ықпал еткен тәжірибелі маман ретінде мен назар аударуға мәжбүр болдым. Тіпті, қатты алаңдай бастадым. Бұл жағдай менің ғана емес, Ұлы көшке мүдделі зиялы қауым өкілдерінің де тынышын кетіре бастағаны анық.

Иә, баяғы Назарбаев заманындағыдай жылыны жүз мыңдап қотарыла көшіп келіп жатқан шеттегі қазақ жоқ!

Өздеріңіз көріп отырсыздар, 2025 жылғы қантардан-қыркүйекке дейінгі елге келген қандастарымыздың саны 16175-ақ адамды екен. Ал, елден кеткендер саны 5975 адам. Көші-қон айырымы 10200 адамды құрапты.

Әрине, осы 16175 қандастың бәрі Алматы облысымен Маңғыстау облысына ғана барып, қоныстана қалмағаны тағы белгілі. Өзге облыстарға да қоныс теуіп жатыр…

Егер, Сіздердің обылыстарыңызға қоныстанған бір-бір уыс қандас шынымен де Қазақстандағы әлеуметтік-эко­но­ми­калық ортаға бейімделу барысында қиын­дықтарға тап болып, Ресей елшісі Алексей Бородавкин айтқандай, ел билігі үшін айтарлықтай проблемалар туғызып, тіпті мемлекетке қауіп төндіріп жатса, онда бұл мәселені Сіздер болып, біз болып, тіпті бүкіл Алаш жұрты бодып ойласуымыз керек!

Мүмкін, Ұлы көшті тоқтата тұру керек шығар?!

Әлде, Ұлы Абайдың «Біріңді қазақ, бірің дос, көрмесең істің бәрі бос!» деген өсиеті мен Sabyr Aday ағамыздың «Әр қазақ менің — жалғызым!» өлеңін басшылыққа алып, әлеуметтік-эко­но­ми­калық ортаға бейімделу барысында қиын­дықтарға тап болған байқұс қандастарымызды Қазақстан өзекке теппей, өз бауырына тартуы керек пе?!!

Бұл — Президентіміздің сұхбатындағы қандастар туралы сөзін оқығаннан кейін туған сұрақ!

Құрметті Марат Елеусізұлы!

Қилыбай Нұрдәулет Игілікұлы!

Енді Сіздерге өтініш!

Бірінші, Қазақстандағы әлеуметтік-эко­но­ми­калық ортаға бейімделу барысында Сіздер басқарып отырған облыстарға қоныстанған қандастарымыз тап болған ҰШ ҚИЫНДЫҚТЫ;

Екінші, Орталық және жер­гілікті билік, сондай-ақ, құқық қор­ғау органдары бұл жағдайға назар ау­дару­ға мәжбүр болып отырған соң, әлеуметтік-экономикалық ортаға бейімделу барысында қиындыққа тап болып отырған қандастарымыз зор қауіп тудырып отыр деген сөз.

Осыған байланысты облысқа, тіпті республикаға төніп тұрған ҮШ ҚАУІПТІ;

Үшінші, Қасым-Жомарт Кемелұлы: «Әрине, мен сырттағы ағайынның тарихи Ота­ны­на оралғанын құптаймын. Бірақ, олар­дың қоғамымызға дұрыс кірігуіне қа­тысты мәселелерді шешу қажет.»,-деді аталған сұхбатында.

Иә, бұл мәселе жоғарыдағы мен айтқан екі сұрақтың біреуінің негізінде Сіздер батыл шешім қолданып, шішілулеріңіз керек!

Ендеше, алдағы уақытта қандастарымыздың Президент айтқан осы мәселесін шешу үшін, облыс әкімі ретінде жоспарлаған ҮШ ПРИОРИТЕТТІ МАҚСАТТАРЫҢЫЗДЫ білгім келеді.

Құрметті Марат Елеусізұлы!

Қилыбай Нұрдәулет Игілікұлы!

Сіздерден осы мәселеге байланысты «ҮШ ҚИЫНДЫҚ»-ты, одан төніп тұрған «ҮШ ҚАУІПТІ» және оны шешу үшін жоспарлаған «ҮШ ПРИОРИТЕТТІ МАҚСАТТЫ» жеке-жеке айтып, осы хатыма нақты жауап берулеріңізді сұраймын.