Жамбыл облысында Қазақстан Республикасы Қарулы Күштері Әуе қорғанысы күштеріне тиесілі ұшқышсыз ұшатын аппарат құлады. Бұл ақпаратты Қорғаныс министрлігінің баспасөз қызметі ресми түрде растады.

Төтенше жағдай Талас ауданының аумағында, әскери мамандардың жоспарлы оқу-жаттығу ұшу жиынын өткізу барысында орын алған. Ведомство өкілдерінің мәлімдеуінше, апаттан ешкім зардап шеккен жоқ.

«Оқиға салдарынан жарақат алғандар мен қираған нысандар тіркелген жоқ. Жергілікті тұрғындарға, елді мекендер мен инфрақұрылым нысандарына ешқандай қауіп төніп тұрған жоқ. Алдын ала болжам бойынша, апатқа техникалық ақаулар себеп болуы мүмкін. Оқиғаның барлық мән-жайын егжей-тегжейлі анықтау үшін арнайы комиссия құрылып, оқиға орнына аттанды», – деп хабарлады министрліктен.

Қазіргі уақытта арнайы мамандар аппарат құлаған аумақты жіті тексеріп, техникалық апаттың нақты себеп-салдарын анықтау үстінде.

Abai.kz