جامبىل وبلىسىندا قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنە تيەسىلى ۇشقىشسىز ۇشاتىن اپپارات قۇلادى. بۇل اقپاراتتى قورعانىس مينيسترلىگىنىڭ ءباسپاسوز قىزمەتى رەسمي تۇردە راستادى، دەپ حابارلايدى Qaz365.kz.

توتەنشە جاعداي تالاس اۋدانىنىڭ اۋماعىندا، اسكەري مامانداردىڭ جوسپارلى وقۋ-جاتتىعۋ ۇشۋ جيىنىن وتكىزۋ بارىسىندا ورىن العان. ۆەدومستۆو وكىلدەرىنىڭ مالىمدەۋىنشە، اپاتتان ەشكىم زارداپ شەككەن جوق.

«وقيعا سالدارىنان جاراقات العاندار مەن قيراعان نىساندار تىركەلگەن جوق. جەرگىلىكتى تۇرعىندارعا، ەلدى مەكەندەر مەن ينفراقۇرىلىم نىساندارىنا ەشقانداي قاۋىپ ءتونىپ تۇرعان جوق. الدىن الا بولجام بويىنشا، اپاتقا تەحنيكالىق اقاۋلار سەبەپ بولۋى مۇمكىن. وقيعانىڭ بارلىق ءمان-جايىن ەگجەي-تەگجەيلى انىقتاۋ ءۇشىن ارنايى كوميسسيا قۇرىلىپ، وقيعا ورنىنا اتتاندى»، – دەپ حابارلادى مينيسترلىكتەن.

قازىرگى ۋاقىتتا ارنايى ماماندار اپپارات قۇلاعان اۋماقتى ءجىتى تەكسەرىپ، تەحنيكالىق اپاتتىڭ ناقتى سەبەپ-سالدارىن انىقتاۋ ۇستىندە.

Abai.kz