Жыл басынан бері қазақстандық жұмыс берушілер Электронды еңбек биржасында 845 мың бос жұмыс орнын орналастырды, оның 432 мыңы — жумысшы мамандарға арналған. Бұл туралы Үкімет отырысында Еңбек және халықты әлеуметтік қорғау министрі Асқарбек Ертаев мәлімдеді.

Министрдің айтуынша, портал арқылы жұмыс іздеушілердің 60–70%-ы жұмысқа орналасады. Дегенмен, жарияланған бос орындардың 30–40%-ы бойынша жұмыс берушілер қажетті мамандарды таба алмай келеді. Кадр тапшылығы салдарынан компаниялар уақытша шетелдік жумыс күшін тартуға мәжбүр — жыл сайын Қазақстанға жұмыс істеу үшін 300 мыңға жуық шетелдік келеді.

«Яғни, жұмыс істегісі келген адамға жұмыс табылады ғой?» — деп сұрады Премьер-министр Олжас Бектенов.

«Иә. Жұмыс істегісі келген адамға жұмыс бар», — деп жауап берді Ертаев.

Abai.kz