Нұркен Асанов әлеуметтік желідегі жазбасында қоғамдағы жемқорлық, адамгершілік құндылықтардың әлсіреуі, ұрпақ тәрбиесі және халыққа адал қызмет ету мәселелерін көтерді.

Ол елдің болашағы билікке келген адамдардың жасына емес, олардың санасы мен адамдық қасиетіне байланысты екенін айтып, «аспаннан доллардың жаууына себепші болғандар» туралы да пікір білдірді, деп хабарлайды

«Тексізге бақ тез қонады, бірақ баянсыз болады»

Нұркен Асанов жазбасын тектілік пен адамгершілік туралы ойдан бастаған. Оның пайымынша, адамның өмірдегі жетістігі мен қоғамдағы орны оның шынайы болмысын айқындай бермейді.

«Тексізге бақ тез қонады, бірақ баянсыз болады! Тектіге бақ кеш қонады, бірақ баянды болады! Бақытсыздық шүкірсіздіктен, ал шүкірсіздік сенімсіздіктен екені хақ!» – деп жазды ол.

Автор адамның өмірдегі басты міндеті дүниеге адам болып келу ғана емес, адамдық қасиетін жоғалтпай өмір сүру екенін атап өтті.

Ол бұл ойын орман мен адам арасындағы салыстыру арқылы жеткізген.

«Орманның азулысы, тырнақтысы жолбарыс болғанымен, орманның иесі адам болып қала бермек. Елдің азулысы, тырнақтысы, ақылдысы, білімдісі тексіз пенделер болып көрінгенімен, елдің иесі әрбір осы елдің азаматтары, яғни халық!» – деді Нұркен Асанов.

Оның айтуынша, елдің шынайы иесі белгілі бір лауазым иелері немесе ықпалды адамдар емес, халықтың өзі.

«Жастар келді деп қуанудың қажеті жоқ»

Жазбада ұрпақ тәрбиесі мен қоғам санасының өзгеруі мәселесіне де ерекше назар аударылған.

Нұркен Асанов қоғамдағы келеңсіздіктердің тамырын отбасындағы тәрбие мен қалыптасқан құндылықтардан іздейді. Оның пікірінше, дастарқан басында өнегелі әңгімеден гөрі дүние, байлық пен ұрлық туралы сөздің басым болуы кейінгі ұрпақтың дүниетанымына әсер етеді.

«Дастарқанда өсиет емес, өсек айтсақ, яғни дүние, байлық, ұрлық, тағы басқа дүниелермен қоректенсек, қанша ұрпақ өтсе де, көрер күнің осы», – деп жазды ол.

Автор ел басқару ісіне жастардың келуін өздігінен оң өзгеріс деп қабылдауға болмайтынын да ескертті.

«Сана өзгермей, адам өзгермейді, адам өзгермей, қоғам өзгермейді. Жастар келді деп қуанудың қажеті жоқ, қандай жастың келгені маңызды болса керек», – деді ол.

Нұркен Асанов бүгінгі өзі сынап отырған адамдардың Қазақстан тәуелсіздік алған кезде бірі төрт, енді бірі он екі жаста болғанын атап өткен.

«Бүгінгі мына пенделер еліміз Тәуелсіздік алғанда біреуі 4 жаста, біреуі 12 жаста болған жандар екен. Дастарқанның қасиетін сезінбей, өсиет емес, өсекпен қоректенгендіктің нәтижесі деп білемін», – деп жазды автор.

Осылайша, ол қоғамдағы теріс әрекеттерді тек буын алмасуымен шешу мүмкін емес екенін, ең алдымен адамның тәрбиесі мен санасы өзгеруі қажет екенін жеткізді.

«Ит емгендер мен сүт емгендер»

Нұркен Асанов жазбасында халықтық ұғымдарға сүйеніп, адам бойындағы тектілік пен тексіздікті салыстырған.

«Дана қазақ халқы баланы екіге бөлген. Ит емгендер мен сүт емгендер деп. Ит емген деп тексіз ұры-қары, елдің сорына іс қылғандарды атаса, сүт емген деп халыққа қалтықсыз, шынайы еңбек еткен жандарды атаған», – деді ол.

Автор бұл салыстыру арқылы қоғамға пайдасын тигізетін азаматтар мен жеке басының мүддесін жоғары қоятын адамдардың арасындағы айырмашылықты көрсеткісі келген.

Оның пікірінше, адамды қоғамдағы дәрежесі немесе байлығы емес, халыққа жасаған қызметі мен адалдығы айқындауы тиіс.

«Аспаннан доллардың жаууына себепші болғандар – таудың көрінген беті ғана»

Жазбаның тағы бір тұсында Нұркен Асанов «аспаннан доллардың жаууына» қатысты пікір білдіріп, қоғамдағы келеңсіз әрекеттердің ауқымы сырт көзге көрінгеннен әлдеқайда кең болуы мүмкін екенін меңзеді.

«Қысқасы, бүгінгі аспаннан доллардың жаууына себепші болғандар таудың бізге көрінген беті ғана болса керек…» – деп жазды ол.

Алайда автор бұл сөзінің нақты қандай оқиғаға немесе кімдерге қатысты екенін ашып айтпаған.

Ол халықтың мүддесіне қарсы әрекет етіп, жеке басының пайдасын көздейтін адамдарды қатаң сынға алды.

«Халықтың зорына емес, сорына амал еткендер, қалтасына қол сұғып, іс қылғандар бола тұра текті көрінген сасық текелерден құтылар күн қашан туады екен деген арманнан басқа айтарым жоқ», – деді Нұркен Асанов.

«Елдік мүддеде сатқындыққа жол жоқ»

Автордың жазбасында елдік мүдде, халыққа қызмет ету және қоғамдық жауапкершілік мәселелері де кеңінен қозғалған.

Оның айтуынша, халық атынан материалдық немесе рухани қызмет көрсететін азаматтардың ниеті таза, мақсаты айқын болуы керек.

«Халықтың атынан шынайы, таза ниет, елдік мүдде тұрғысында материалды немесе рухани қызмет жасаушылардың тасы сайға емес, әрдайым өрге домаламақ», – деп жазды ол.

Нұркен Асанов елдік мүдде жолында пікір қайшылығы болуы мүмкін екенін, алайда мұндай келіспеушіліктер сатқындыққа ұласпауы тиіс екенін атап өтті.

«Елдік мүдде, халыққа қызметте сатқындыққа жол жоқ. Тек келіспеушіліктер болуы мүмкін. Ал келіспеушіліктер орын алса, сезім мен нәпсінің байлау жібін өтпес пышақпен де үзе аларың ақиқат», – деді ол.

Сонымен бірге автор елге қызмет етуді тек ұранмен шектеуге болмайтынын ескертті. Оның сөзінше, шынайы ниет пен елдік мүдде нақты әрекет арқылы көрінуі қажет.

«Алайда елдік мүдде, шынайы ниет, бос сөз, құрғақ лозунгтар халықтың көзін де, өзін де тойдырмайды», – деп жазды Нұркен Асанов.

«Заң мен тәртіп» қағидасына тоқталды

Жазба авторы қоғамдағы әділетсіздік пен жемқорлыққа қарсы күресті Мемлекет басшысының «Заң мен тәртіп» қағидасымен байланыстырған.

Ол қоғамды теріс әрекеттерден тазарту үшін әділет пен шындық үстемдік етуі қажет деп есептейді.

«Мусорды, қоқыс-қоқымды өртеп құтыларсың, ал адамдық қоқыстарды әділет пен шындық отымен тазалап құтыласың демекші, ел Президентінің айтқан «Заң мен тәртіп» қағидасының астарында осы ұстаным болса керек», – деді ол.

Автордың пайымынша, қоғамдағы әділеттілікті орнықтыру үшін заң талаптары мен адамгершілік ұстанымдары қатар жүруі тиіс.

«Қараңғы үңгірден ғибрат алуымыз керек»

Нұркен Асанов жазбасында діни-рухани құндылықтарға да тоқталып, ғұламаларға телінетін ғибратты ойды мысалға келтірген.

«Үңгірдің тұңғиығына құлап, шыға алмаған пенделерге, Пайғамбарымыздың үңгірге кірсе де сол қараңғы үңгірден Алланың Құран ілімін алып шыққанынан ғибрат алуымыз керек», – деген сөзді келтірді ол.

Осы мысал арқылы автор қиындыққа тап болған адамның рухани құндылықтардан ажырамауы керектігін меңзеген.

«Сол айтпақшы, үңгірдің қараңғылығына түсіп, қапы қалмас үшін, елдік мүдде, халықтың ықыласына, халықтың пайдасына, Алаштың арманына қызмет еткендердің ертеңі әрі жарық, әрі рухы ләззатқа бөленері хақ!» – деп жазды Нұркен Асанов.

«Саналы қоғам – сапалы мемлекет»

Жазба соңында автор елдің болашағы әр азаматтың санасына, адамгершілігіне және халық алдындағы жауапкершілігіне байланысты екенін тағы бір мәрте атап өтті.

Ол қоғамды жеке бастың мүддесінен жоғары тұрып, елдің игілігі үшін еңбек етуге шақырды.

«Саналы қоғам – сапалы мемлекет, сапалы мемлекет – төрлі елдің кепілі демекші, әлемге де, досқа да, дұшпанға да күлкі болмай, төрде отырып төрелік етер, қиялды арманға емес, арманды амалға айналдырар ел болалық, ағайын!» – деп түйіндеді Нұркен Асанов.

 Abai.kz