Алматы қаласындағы Нан-тоқаш өнімдерін шығаратын «Ақсай нан» комбинатындағы барлық кондитерлік өнімдерінің құны 20 пайыз өсті. Қала бойынша қара нан, тоқаш, батон сынды нан өнімдерінің бағасына шамамен 30 теңге қосылмақ. Baq.kz-тің жазуынша  бағаның көтерілуіне ұн мен өзге қоспалардың қымбаттауы себеп болған. Бұл туралы «Ақсай-нан» ЖШС директоры Иван Денисов: «Комбинатта бағаның көтерілуі девальвациядан соң шикізат жеткізушілерінің өнімдердің бағасын қымбаттатып жібергеніне байланысты болып отыр. Қазір коммерциялық нан бағасы - 7, тоқаш - 10, ал кондитерлік өнім бағасы 20 пайызға дейін көтерілді», - деген. Ақпан айында девальвациядан кейін жасалған 4 жақты мемарандумда тек "әлеуметтік нан" бағасының дүкен сөрелерінде 61 теңгеден аспауы тиіс делінген. Алайда кәсіпкерлік басқармасының мамандары ұннан жасалған өнім құнын тұрақтай алмаймыз деп отыр. Дегенмен Алматы қалалық кәсіпкерлік, индустриалды-инновациялық даму және ауыл шаруашылығы басқармасының бас маманы Дамир Тазабек: «Қыркүйек айына дейін Алматы қаласында бөлке нанның бағасы қымбаттамайды. Біз бұл бағытта қадағалау жұмыстарын жүргізіп жатырмыз», - дейді.

Абай-ақпарат