Ресей президенті Владимир Путин мен Украина президенті Петр Порошенко Беларус  астанасы Минскіде бетпе-бет кездесіп, Украинаның шығысындағы жағдайды талқылады. «Азаттық радиосының» жазуынша Путин Порошенкомен болған кездесуді “позитивті” жүрді деп, Мәскеу бітімгерлік процестерді нығайту үшін “барлық мүмкіндікті жасайтынын” мәлімдеген. Ол бұған қоса газ тасымалдау мәселесіне қатысты келіссөздер жүргізу туралы да уағдаластық жасалғанын айтты.

Порошенконың айтуынша, Киев пен Мәскеу Украинаның шығысындағы жағдайды реттеудің алғышарттарын жасау үшін екі елдің шекара қызметтері және билік өкілдері арасында келіссөздер бастауға келісіпті.

Минскіде мұның алдында Путин, Порошенко, Беларусь президенті Александр Лукашенко  және Еуропа Одағының сыртқы саясат жөніндегі комиссары Кэтрин Эштонның қатысуымен көпжақты келіссөздер өтті. Мәскеу мен Киевтің ұстанымдары үйлесе бермегендіктен, тіпті кейбір жағдайда түбірімен қарама-қайшы келіп жатқандықтан келіссөздер күрделі болған. Сондай-ақ Минскіде Кеден одағы басшылары да кездесіп, сауда кеңістігінің жаңа қадамдары мен алдағы алыс-беріс жоспарларын да талқылаған. Минскіге барған ҚР президенті Назарбаев пен Украина президенті Порошенконың да өзара жеке кездесулері болды. Екі жақты кездесу барысында Қазақстан президенті Нұрсұлтан Назарбаев бейбітшілікті дәріптеп, Қазақстанның Украинаға гуманитарлық көмек беретінін жеткізді әрі әлем елдерін Украинаға көмек көрсетуге шақырды. 

Абай-ақпарат