Оңтүстік Қазақстан облысының әкімі Бейбіт Атамқұлов ауыр атлетикадан әлем чемпионатының күміс жүлдегері Жазира Жаппарқұл мен оның бапкері – ауыр атлетикадан ҚР еңбек сіңірген шебері В.Нюді марапаттады, - деп хабарлайды Абай-ақпарат Оңтүстік Қазақстан облысы әкімдігінің баспасөз қызметіне сілтеме жасап.
Бүгін өңір басшысы Бейбіт Атамқұлов ауыр атлетикадан ҚР еңбегі сіңген спорт шебері Жазира Жаппарқұл мен оның бапкері - ауыр атлетикадан ҚР еңбегі сіңген спорт шебері В.Нюді қабылдады.
Кездесуде облыс әкімі Жазира Жаппарқұлды таяуда ғана Американың Хьюстон қаласында өткен ауыр атлетикадан ересектер мен әйелдер арасындағы әлем чемпионатында жеңіп алған күміс жүлдесімен құттықтап, 4 миллион теңгенің қаржылай сертификатын табыстады. Ал бапкері В.Нюге 1 миллион теңгенің қаржылай сыйлығы берілді.
Басқосуда аймақ басшысы өңіріміздегі спорт саласындағы жұмыстардың жоғары деңгейде атқарылып жатқанын айтып, спортшыларға алғысын білдірді.
Еске салайық, осы жылдың 20-29 қараша аралығында Американың Хьюстон қаласында ауыр атлетикадан ересектер мен әйелдер арасында әлем чемпионаты өткен болатын. Қазақстан Республикасының ұлттық құрама сапында оңтүстікқазақстандық 4 спортшы қатысып, нәтижесінде Жазира Жаппарқұл 69 келі салмақта 2-орынды жеңіп алып Рио-де-Жанейро олимпиадасына жолдаманы жеңіп алған еді.
Айта кетейік, Оңтүстік Қазақстан облысы спортшыларының қоржынында Рио-де-Жанейро олимпиадасына, әзірге, 12 жолдама бар. Осы көрсеткіш бойынша Оңтүстік өңірі республикада көш бастап тұр. Жолдаманың саны жыл соңына дейін мұнан да артуы мүмкін. Өткен жылы облыс спортшыларының қанжығасында 10 жолдама болған еді.
ОҚО әкімінің баспасөз қызметі
Aбай-ақпарат
