Шұғыл! 28-маусым күні Ыстамбұлдың «Ататүрік» Халықаралық әуежайында ИШИМ содырлары теракті жасады,-деп хабарлайды түркиялық «Akifhaber.com» порталы.

Түркия Республикасының Әділет министрі Бекір Боздақтың хабарлауынша, лаңкестік оқиға салдарынан әуежай маңында болған 31 адам қаза тауып, 147-і жарақат алған.

Associated Press агенттігінің мәліметтеріне сүйенсек, жарылыс салдарынан қазір қаза тапқандардың саны 52 адамға жеткен. Деседе Түркияның құзырлы органдары бұл мәліметті растаған жоқ.  Түркия СІМ деректерінде қаза тапқандардың басым көпшілігі Түркия азаматтары болғандығы айтылған. Сондай-ақ, Халықаралық әуежай ішінде болған шетелдік азаматтар да бар.

Ыстамбұл қаласының басшысы Васып Шахиннің мәлімдеуінше, теракті 28-маусым күні сағат 22:00-де болған. Лаңкестер әуежайдың үш нүктесінде жарылыс жасаған. Әуелі Әуежайдың кіре беріс  тұсында, сосын шығу пункті маңында және әуежайдың автотұрағында бомбалар жарылған. Васып Шахиннің айтуынша жарылысты жасаған күдіктілер анықталуда. Қазірге белгілі болжамдар бойынша бомба қойғандар 4 адам болуы мүмкін. Қала басшысының мәлімдемесінде терактіні ИШИМ содырлары жасауы мүмкіндігі де айтылған.

Қайғылы оқиғаға байланысты Қазақстанның Премьер-министрі Кәрім Мәсімов «Твиттер» желісі арқылы көңіл айтқан.

Қазақстан Сыртқы істер министрлігінің хабарлауынша «Ататүрік» әуежайындағы жарылыстар кезінде қаза тапқандардың арасында Қазақстан азаматтары жоқ.

Abai.kz