Үкіметтің Шу облысындағы құзырлы өкілі Бақтыбек Құдайбергенов "Алтынкен" компаниясының алтынды өз фабрикасында игермей отырғанын түсінбей, құқыққорғау органдарына шағым өткізді. Мемлекеттік органдар алтын кенін сыртқа шығаруға рұқсат беру ісін енді бір біріне сілтей бастады.

Талдыбұлақ кенінде 77 тонна алтын бар. Кәсіпорын 2006 жылы құрылған. Қытайлық "Цзыцзинь" компаниясы "Суберб Пасифик лимитед" арқылы 2011 жылы "Алтынкеннің" 60 пайыз үлесін сатып алды, қалған 40 пайызы мемлекеттік "Қырғызалтын" компаниясына тиесілі.

Қытайлық тарап алтын өндіретін фабриканы іске қосу үшін, жобаға 188 миллион юань инвестиция құюға уәде берген. Дегенмен компания онда концентратты шикі өңдеп, соның 1170 тоннасын Қытайға шығарған.

"Алтынкен" бас директорының орынбасары Вэн Яфен мұнда таза алтынды бөліп шығаруға мүмкіндік жоқ деп ақталған. Бұған дейін "Алтынкен" компаниясы ресми түрде 600 келі алтын өндірген. Кәсіпорын жыл аяғына дейін тағы 200 келі өндіреді деп жоспарланған.