Кеше ғана тағайындалған Ұлттық экономика министрі  ұлтының тілін білмейтін болып шықты…

Тимур Сүлейменов Парламент Мәжілісі отырысынан соң тілшілерге : «Мәскеуде бес жыл бойы қызмет етіп, туған тілімді ұмытып қалдым. Бірақ алты ай ішінде үйреніп аламын», — деп қазақтілді ақпарат құралдары жазып жатыр. 

Бұлай мемлекеттік тілді ұмытып қалдым, ана тілімді білмеймін деп еш қысылмай, салтанатты түрде мәлімдейтін министр әлемде тек Қазақстанда ғана болады…  Парламентте де, «Ау, мемлекеттік тілді білмей, қалай мемлекеттің министрі боласың?» дейтін бір депутат жоқ…

Мысалы, Өзбекстанда осылай «өзбек тілін ұмытып қалдым» деген министр бола ма?  Қырғыз елінде де болмайды. Тағы да өзбек пен қырғыз «маңқа қазақ» деп мазақтаса, шыжбалақ қағамыз… Бұл парламент алдында «Миымды ауыстырмасаңдар, қазақ тілін үйрене алмаймын» деген экс-сыртқы істер министрі Ерлан Ыдырысовтан кейінгі екінші орындағы мәлімдеу болды.

«МЕМЛЕКЕТТІК ТІЛГЕ МИЫ ЖЕТПЕГЕНДЕР ҚАЛАЙ МИНИСТР БОЛАДЫ?..  БІЗДЕ МИСЫЗ МИНИСТР, МИСЫЗ ӘКІМ, МИСЫЗ ДЕПУТАТ, МИСЫЗ ШЕНЕУНІКТЕР БОЛУЫ ЗАҢДЫЛЫҚ болса, онда БІЗ ҚАНДАЙ ЕЛМІЗ?»   http://www.qazaquni.kz/?p=7602   Мемлекеттік тілді білмесе де, Ерлан Ыдырысовты  екі рет министр қылып, 20 жылда өзінің жақсы білетін тіліндегі ел Ұлыбританиға екінші рет елші  етіп, зорға құтылып едік, енді мынау, тағы бір Ресей тілінде сөйлейтін министр келді…  

Мәскеуде 5 жыл тұрғанда қазақ тілін ұмытып қалыпты-мыс. Ау, өмір бойы Қазақстанда тұрып келе жатқан өзге ұлт өкілдері, неміс, өзбек, ұйғыр, шешен, армян, грузин, азербайжан, кәрістердің министр емес…. қарапайым адамдарының өзі неге ана тілдерін ұмытып қалмайды, министр мырза? Қырық жасқа жақындаған сіз 5 жыл Ресейде тұрсаңыз, 35 жыл Қазақстанда, отаныңызда тұрдыңыз ғой… Сонда өз еліңіздегі 35 жыл өзге елдегі 5 жылға қарағанда босқа өткен бе?  Осыны бір сәт ойланып көрдіңіз бе? НЕГЕ?

Баяғыда шалғайдағы Шардарада, Қызылқұмда өскен менің бір Бақыт деген сыныптасым  Ресейге үш жылдық әскерге барып келіп,  «что такой баурсак?» деп «қазақшаны ұмытып қалып»  орысша сөйлеп жүрді.  Қырманға барып қалғанда күріш тазалап жатқан ағайындарына орысша шүлдірлей бастағанда, Жарылқап деген көкеміз әке-шешесінен түк қоймай сыбап, дәу күрегімен қырманды айналдыра қуғанда әлгінің «ойбай, көке, қойдым, енді орысша сөйлемеймін» деген жан дауысы қазақша шығып кеткен еді…

Біздің мемлекеттік тілін білмей мемлекеттік қызметкер болып, лауазым иеленіп жүрген министрлер, әкімдер, депутаттар, жалпы шенеуніктерге 25 жыл  Ресей тілінде сөйлеуге рұқсат беріп қойған Елбасымыз да енді ширек ғасырдан соң, «Жетті енді!» деп жақсылап қазақша сыбап алса, бірден қазақша сайрап шыға келер еді барлығы….

Министрлер мемлекеттік тілін ұмытады, ал біз «Арман, арман, арман-ай» деген әнді қашан ұмытар екенбіз…

P.S.  Тимур Сүлейменов мырза, мына сізге арналған мақаланы Ресей тіліне аударып жазатындай Мәскеуде жүрген жоқпыз, сондықтан министрлігіңізде қазақша білетін біреу болса,  аудартып алып  оқып, жауап беруіңізді сұраймын.  

Қазыбек ИСА

qazaquni.kz