2016 жыл мақтаралдықтар үшін табысты болды. Олай дейтініміз, соңғы 1 айдың ішінде 120 мың гектар алқап жыртылып,  жеміс егілді. Сонымен қатар, 80 мың гектар жердің соры шайылды, - деп хабарлайды Абай-ақпарат.

Еңбекке ерте кіріскен ауданда бүгінгі таңда 150 гектар жерге  қырыққабат, 46 гектардан астам жерге пияз егілді.

Келер жылғы жазғы дастарханның ажары – қауын-қарбыздың да көшеттері дайын.  Еңбектің ебін, диханшылықтың көзін тапқан мырзашөлдіктер  жылыжайдан өнім өндіруден  де қалыс қалар емес. Қыс ауасына қарамай тырбаңдаған жұрттың жиған-тергені арнайы қоймаларда сақтаулы.

Уақыт сағаты таяғанда өзге облыстарға экологиялық таза күйде жеткізілмек. Айта кетейік, Мырзашөл халқының былтырғыға қарағанда ұрты майлы. Сан-саладағы көрсеткіштері де едәуір жоғары. Оң нәтижеге дихандар мемлекеттік қолдаудың арқасында жетіп отыр.

Жамантай Бейсенбаев, Мақтарал ауданының әкімі;

Ауданның экономикасының негізін ауыл шаруашылығы құрайды. Өткен жылы өндірілген ауылшаруашылығы өнімдерінің жалпы көлемі 59,7 млрд теңге болды, оның ішінде: мал шаруашылығы 14,1 млрд. тенге, өсімдік шаруашылығы 45,2 млрд. теңге, ауылшаруашылығы саласына көрсетілген қызмет 425,7 млн. теңге болып, нақты көлем индексі 101,9 пайызды  құрады.

Абай-ақпарат