ҚР Конституцияның 10-бабындағы конституциялық түзетулерге сәйкес, «террористік қылмыстар жасағаны үшін, сондай-ақ Қазақстан Республикасының өмірлік маңызы бар мүдделеріне өзге де ауыр зиян келтіргені үшін азаматтықтан айыруға соттың шешімімен ғана жол берілетіні» деп атап көрсетілген.

Осыған байланысты «елдің өмірлік маңызы бар мүдделері» ұғымын және қылмыстар тізбесін айқындау қажеттігі туындап отыр. Әділет вице-министрі Зәуреш Баймолдинаның айтуына қарағанда, заң жобасының тұжырымдамасы ведомствоаралық комиссияның талқылауына шығарылмаған. Ұсыныстар тек мемлекеттік органдар тарапынан жасалған. «Біз ҚР ҚК-ге ешбір жаңа құрамды, жаңа бапты ұсынып отырғанымыз жоқ. Бұлардың барлығы қолданыстағы құрамдар және осыған тек қосымша яғни азаматтықтан айыру түріндегі қосымша жаза ескерілген», –дейді ол. Анығы – конституциялық өзгерістерге сәйкес Қылмыстық Кодекске қосымша жаза түрлері ретінде азаматтықтан айыруға байланысты қосымшалар енгізілетіндігі.