مەملەكەتتىك ءتىلدىڭ ءورىسىن شەكتەيتىن شەنەۋنىك - ازاماتتىقتان ايىرىلسىن!
قر كونستيتۋتسيانىڭ 10-بابىنداعى كونستيتۋتسيالىق تۇزەتۋلەرگە سايكەس، «تەرروريستىك قىلمىستار جاساعانى ءۇشىن، سونداي-اق قازاقستان رەسپۋبليكاسىنىڭ ومىرلىك ماڭىزى بار مۇددەلەرىنە وزگە دە اۋىر زيان كەلتىرگەنى ءۇشىن ازاماتتىقتان ايىرۋعا سوتتىڭ شەشىمىمەن عانا جول بەرىلەتىنى» دەپ اتاپ كورسەتىلگەن.
وسىعان بايلانىستى «ەلدىڭ ومىرلىك ماڭىزى بار مۇددەلەرى» ۇعىمىن جانە قىلمىستار تىزبەسىن ايقىنداۋ قاجەتتىگى تۋىنداپ وتىر. ءادىلەت ۆيتسە-ءمينيسترى زاۋرەش بايمولدينانىڭ ايتۋىنا قاراعاندا، زاڭ جوباسىنىڭ تۇجىرىمداماسى ۆەدومستۆوارالىق كوميسسيانىڭ تالقىلاۋىنا شىعارىلماعان. ۇسىنىستار تەك مەملەكەتتىك ورگاندار تاراپىنان جاسالعان. «ءبىز قر قك-گە ەشبىر جاڭا قۇرامدى، جاڭا باپتى ۇسىنىپ وتىرعانىمىز جوق. بۇلاردىڭ بارلىعى قولدانىستاعى قۇرامدار جانە وسىعان تەك قوسىمشا ياعني ازاماتتىقتان ايىرۋ تۇرىندەگى قوسىمشا جازا ەسكەرىلگەن»، –دەيدى ول. انىعى – كونستيتۋتسيالىق وزگەرىستەرگە سايكەس قىلمىستىق كودەكسكە قوسىمشا جازا تۇرلەرى رەتىندە ازاماتتىقتان ايىرۋعا بايلانىستى قوسىمشالار ەنگىزىلەتىندىگى.
ەلدىڭ «ومىرلىك ماڭىزى بار مۇددەلەرىنە زيان كەلتىرۋ» ساناتىنا مەملەكەتتىڭ اۋماقتىق تۇتاستىعىنا، كونستيتۋتسيالىق قۇرىلىستىڭ بەرىكتىگىنە، قورعانىس قابىلەتتىگىنە، قاۋىپسىزدىككە جانە باسقا دا قۇندىلىقتارعا قاستاندىق جاساۋ سەكىلدى ءىس-قيمىلدار جاتاتىنى ءمالىم.
سوندىقتان:
ا) اقپاراتتىق ەكپانسيا ارقىلى ەلدىڭ بىرلىگىنە نۇقسان كەلتىرەتىن،
ءا) قازاقستان اۋماعىندا كازاچەستۆو ۇيىمدارىنىڭ اسكەري فورماسىن كيىپ تايراڭدايتىن،
ب)قازاقستاننىڭ مەملەكەتتىك ءتىلىنىڭ دامۋىنا كەدەرگى جاسايتىن
جەكەلەگەن تۇلعالاردى ۇلتىنىڭ كىم ەكەندىگىنە قاراماستان سوت ارقىلى قازاقستان ازاماتتىعىنان ايىراتىن قوسىمشالار قاراستىرىلعان ءجون دەپ ەسەپتەيمىن.
سوندا مەملەكەتتىك ءتىلدىڭ ءورىسىن كەڭەيتۋگە توسقاۋىل قويىپ جۇرگەن كەز كەلگەن شەنەۋنىكتى سوتقا تارتاتىن، ءارى ونى قازاقستان ازاماتتىعىنان ايىراتىن مۇمكىندىك تۋار ەدى.
مارات توقاشباەۆ
Facebook-تەگى پاراقشاسىنان
