ҚР Ауылшаруашылық министрлігінің Жер ресурстарын басқару комитеті арнайы тексеру жүргізіп, комитеттің тексеру қорытындысы туралы 2016 жылдың 22 шілдесіндегі № 42-16-29-1/1 актісіне сәйкес Шығыс Қазақстан облысы Үржар ауданының әкімшілігі тарапынан «Бәтуа» «Ырғын», «Мәнфағат» ЖШС 91432,5 гектар жерді заңсыз жалға бергенін анықтаған.

Соның нәтижесінде АШМ Жер ресурстарын басқару комитеті аталған серіктестіктерге жер беру туралы ШҚО Үржар ауданының жер беру жөніндегі қаулыларының күшін жою туралы сотқа арыз беріп, нәтижесінде, 23 қараша 2016 жылы ШҚО арнайы мамандандырылған экономикалық сотының шешімімен «Бәтуа» ЖШС жер пайдалану құқығындағы 84 182 гектар ауылшаруашылық жері мемлекетке қайтарылған болатын.

Одан кейін біз, ҚР Ауылшаруашылық министрлігіне қалған 7 250 гектар жердің не үшін қайтарылмай қалғаны туралы тағы хаттар жазып, АШМ Жер ресурстарын басқару комитетімен бірлесе жұмыс жасаған едік.

АШМ Жер ресурстарын басқару комитетінің талап арызының нәтижесінде ШҚО арнайы мамандандырылған экономикалық сотының 03 шілде 2017 жылғы №2-2143-17 шешімімен қытай компаниясының үлесі бар «Бәтуа» ЖШС жер пайдалану құқығына берілген 7 244,7 гектар және жеке меншікке сатылып кеткен 5,3 гектар жер мемлекетке қайтарылды.

Осы істің басы қасында болып, бірге ат салысқан «Алаш жолы» қозғалысының мүшелеріне, ҚР Бас прокуратурасына, ШҚО прокуратурасына, Ауыл шаруашылық министрлігіне және министрліктің Жер ресурстарын басқару комитетіне ризашылығымызды білдіреміз.

Жұмыс одан әрі жалғасуда.

Құрметпен, Мақсат Ілиясұлы және Айдын Егеубаев

Abai.kz