«Біріншіден, Ресей Қазақстанға көлді "сыйға тартты" деу дұрыс емес, көлдің бір бөлігі бұрыннан бері Қазақстан аумағында орналасқан. Шекара сызығы 2005 жылдың 18 қаңтарындағы келіссөзге сәйкес белгіленген. Бұл учаске о бастан шекаралық жер. Бұл жерде ешқандай бөліс болған жоқ», – деп мәлімдеді Әнуар Жайнақов.

Новосибирск облысындағы Сладкое көлі Қазақстанға берілді деген ақпарат жергілікті және ресейлік БАҚ-та жарияланған болатын.

Ресейдегі Қазақстан елшілігінің ресми сайтында шекараны бөлуге қатысты түсініктеме берілген. Онда көл екі тарапқа 70:30 болып бөлінген. Басым бөлігі Қазақстанға тиесілі. «Қазіргі кезде аталған учаскеге ешқандай өзгеріс енгізілген жоқ. Шекара белгілері делимитациялау жөніндегі келіссөзге толықтай сәйкес келеді», – делінген Қазақстан елшілігі берген түсініктемеде.

Сладкое көлі Новосибирск облысы Купинск ауданы Покровка ауылынан бес шақырым қашықтықта орналасқан. Көлдің жалпы аумағы 45 гектар.

Abai.kz