Министрліктің хабарлауынша, 2017 жылы қабылданып, 2018 жылы 9 қаңтарда күшіне енген "Телерадио хабарларын тарату туралы" заңға енгізілген түзетулерге сай, шетелдік теле және радио арналар 9 шілдеге дейін Қазақстанда өкілдігін ашуға міндеттелген.
Осы мерзім аралығында Қазақстанда тіркеуге алынған 307 шетелдік теле және радио арнаның 219-ы өз өкілдігін ашқан, 88-і талапты орындамаған. Осыған байланысты 88 арнаның есепке қою туралы куәлігі қайтарылып алынған, енді қызметтері тоқтатылмақ.
Министрлік сайтында жарияланған 88 теле және радио арналары тізімінде ресейлік Russia Today TV, "Дождь" телеарналары, ұлыбританиялық Sky News, америкалық Fox News Channel телеарнасы, Bloomberg Television, France 24 арналары бар.
Ақпарат және коммуникация министрлігі Қазақстанда хабар таратқысы келетін шетелдік теле және радио арналар енді қайта тіркеуге тұрып, өз өкілдігін ашуы тиіс екенін ескертті.
Abai.kz
