«Цифрлық Қазақстан» бағдарламасын Мемлекет басшысы халыққа арнаған Жолдауында ерекше атап өткен болатын. Ақпараттық технологиялардың қарыштап дамып бара жатқан мына заманында IT саласын дамытпасақ, дамыған 30 елдің қатарынан көріну бізге жай арман боп қалары анық. Өйткені, өркениетті елдердің барлығы осы сандық жүйеге көшіп, өнеркәсібінің дамуын және халқының әл-ауқатын жылдан-жылға жақсартып келеді.

1- қыркүйектен бастап Түркістандағы көптеген білім ұялары 1-сыныпқа оқушыларды электронды жүйе арқылы қабылдады. Аймақтағы мектеп басшылары аталған жүйенің тиімділігіне қазірден бастап оң баға беруде. Өйткені оқушыны электронды жүйе арқылы қабылдау -жаңа оқу жылының басталар алдындағы әуре-сарсаңды азайтады. Сондай-ақ саладағы жемқорлықты да жояды екен. Тәлімгерді қабылдау интернет жүйесі арқылы жүзеге асатындықтан ұлын жетектеген ата-аналар мектеп іздеп босқа сандалмайтын көрінеді.

Арыс қаласындағы Сәкен Сейфулин атындағы жалпы орта мектебі биыл жұрт қатарлы қыркүйекте 1-сыныпқа баратын 141 баланы электронды жүйе арқылы қабылдады. Ұстаздар қазірдің өзінде жаңа жүйенің артықшылықтары көп дейді. Мәселен бұрын ата-аналар балаларын мектепке өзі ертіп келсе, енді үйден шықпай ақ баланың құжаттарын порталға енгізуге болады. Қай мектепті таңдаймын десе де ерік ата-ананың өзіңде. Бұл процесс уақытты да үнемдейді.

Талғат Асқаров

С.Сейфулин атындағы ЖОМ директоры

Тиімді жағы бұрын балалар оқу басталып кеткенде де қабылданып жататын. Ал қазір ата-аналар шілде айынан бастап мектепке тіркеп, баласының қай мектепте оқитынын алдын ала біліп отырады. Бұрын ата-аналар баласын мектепке қабылданғаннан кейін алып кетіп қала беретін. Қазір бұл жаңа жүйенің арқасында бір ізге түсті.

Жалпы оқушынының бірінші сыныпқа электронды жүйе арқылы қабылдануы жемқорлық әрекеттерін жоюға да өз септігін тигізеді екен. Өз кезегінде білім ұяларында оқушының санының шамадан тыс асып кетуіне де жол бермейтін көрінеді. Сондай-ақ еліміздегі көптеген білім ұяларында биылдан бастап 3-6-8 сыныпта оқитындарға сабақ жаңартылған мазмұнда өтіле бастады. Сәкен Секйфулин атындағы жалпы орта мектебі де аталған жаңашылдықтан шет қалған жоқ. Мектепте 100 тарта маманның жартысына жуығы бүгінде балаларды жаңа форматта оқытуды қолға алды.

Осылайша мектеп мұғалімдері білім мен спортты қатар дамытуға бар күш жігерімізді салып жатырмыз дейді. Балаларға үйретуден жалықпаған жандар өз еңбегінің жемісі деп шәкірттердің білім шыңына шығып, спорттық сайыстарда топ жарғанын айтады.

Ерлан Отарбаев

Abai.kz