سوت يلميانوۆتى "الاياقتىق" بابى بويىنشا كىنالى دەپ تانىدى. وعان 180 مىڭ سوم (2600 دوللار) ايىپپۇل سالىنادى.

23 قازاندا وتكەن سوت وتىرىسىندا مەملەكەتتىك ايىپتاۋشى بۇرىنعى شەنەۋنىكتى 7,5 جىلعا سوتتاۋىن سۇراعان. سوتتالۋشى سوڭعى سوزىندە كىناسى دالەلدەنبەگەنىن ايتىپ، سوتتان ءادىل شەشىم شىعارۋىن وتىنگەن.

سوت ۇكىمى وقىلعان سوڭ يلميانوۆ جۋرناليستەرگە سوت شەشىمىمەن كەلىسپەيتىنىن مالىمدەدى. ول ادۆوكاتىمەن ءارى قاراي نە ىستەۋ كەرەكتىگىن اقىلداسقىسى كەلەدى.

يكرامجان يلميانوۆ – بۇرىنعى پرەزيدەنت المازبەك اتامباەۆتىڭ سەنىمدى ادامدارىنىڭ ءبىرى. ول مەملەكەت باسشىسى اپپاراتىنىڭ باسشىسى ورىنباسارى جانە پرەزيدەنت كەڭەسشىسى قىزمەتتەرىن اتقارعان. يلميانوۆ سول كەزدە ەلدەگى ىقپالدى ادامداردىڭ ءبىرى بولعان.

باس پروكۋراتۋرا 2018 جىلى 28 قىركۇيەكتە وعان قارسى قىلمىستىق ءىس قوزعادى. تەرگەۋ مالىمەتى بويىنشا، يلميانوۆ پرەزيدەنت اپپاراتى باسشىسىنىڭ ورىنباسارى قىزمەتىن اتقارىپ جۇرگەن ۋاقىتتا ءبىر كاسىپكەردەن 150 مىڭ دوللار پارا العان.

Abai.kz