بيلىك باسىندا حالىققا ۇلگى كورسەتەتىن ۇلتشىل تۇلعالاردىڭ بولماعانىنان شىعار، سوڭعى 30 جىلدا رۋشىلدىق قاتتى اسقىنىپ، رۋشىلدىقتىڭ ەڭ جابايى ءتۇرى پايدا بولدى.

"ىستىق سۋدا" دەمالىپ جاتقان كۇنى ءبىر جىگىتتەرمەن داستارحانداس بولدىق. سول جەردەگى اۋىلداردىڭ بىرىنەن كەلگەندەر ەكەن. اڭگىمە اراسىندا بىرەۋى رايىمبەك باتىر تۋرالى ءسوز قوزعاپ، باتىردىڭ البان ەكەنىن، ءوزىنىڭ رۋلاسى ەكەنىن ايتىپ ابدەن ماقتاندى. مەن وعان: «باۋىرىم، رايىمبەك باتىر قازىر ءتىرىلىپ كەلسە، ەڭ ءبىرىنشى سەنى نايزاعا شانشىپ ولتىرەتىن ەدى!» - دەدىم. تاڭ قالىپ، سەبەبىن سۇرادى. رايىمبەك باتىردان الباننىڭ باتىرى جاساپ وتىرعان وزدەرى ەكەنىن، رايىمبەك باتىردىڭ كەزىندە قازاق ءۇشىن سوعىسىپ ولگەنىن، قازاقتىڭ باتىرى بولعانىن، قازاقتىڭ باتىرى بولعاندىقتان ارعىننان شىققان مالايسارىنىڭ دا ۇرپاققا ۇلگى بولسىن دەپ اناۋ توبەنىڭ ەتەگىندەگى الباننىڭ جەرىندە جاتقانىن ايتتىم. ءالى جىگىت سوسىن ساباسىنا ءتۇسىپ، قاتەلىگىن مويىنداپ، راقمەت ايتىپ ەلپەكتەپ قالدى.

ءبىر رۋدىڭ توڭىرەگىنەن شىعا المايتىن وسىنداي بىقسىما اڭگىمەنى كوپ ەستيمىن. «كەلەسى پرەزيدەنت نايمان بولۋى كەرەك. سول كەزدە عانا ەلدە تەمىردەي ءتارتىپ بولادى!» دەپ وتكەندە تاعى ءبىر اعامىز كوكىپ كەتتى.

ماعان البان بولسا دا، ارعىن نە اداي بولسا دا ءبارىبىر، ۇلتتى ۇيىستىرا الاتىن ۇلى تۇلعا بولىپ شىقسا بولدى!

جولىمبەت ماكىشتىڭ facebook پاراقشاسىنان

Abai.kz