جۇما, 20 قاراشا 2026
انە، كوردىڭ بە؟ 136 0 پىكىر 20 قاراشا, 2026 ساعات 14:07

حريستياندار ازايىپ، مۇسىلماندار كوبەيەدى…

سۋرەت: report.az سايتىنان الىندى.

مىناداي ءبىر زەرتتەۋدى كوزىمىز شالىپ قالدى: «2035 جىلعا قاراي الەمدە مۇسىلماندار سانى حريستيانداردان اسىپ ءتۇسۋى مۇمكىن. ال حريستيان ءدىنىنىڭ ورتالىعى افريكا بولادى»، - دەيدى.

مۇنداي بايلام جاساعان - پولشانىڭ «CASPAR» دەيتىن زەرتتەۋ ورتالىعى مەن اقش-تىڭ «Pew Research Center» دەيتىن ورتالىعىنىڭ زەرتتەۋشىلەرى ەكەن.

ولاردىڭ بولجامىنشا، 2020 جىلدان باستالعان ۇردىسكە (تەندەنتسيا) ساي، 2035 جىلعا دەيىن الەمدە مۇسىلماندار سانى حريستيانداردان اسىپ جىعىلادى. ال 2070 جىلعا دەيىن الەمدەگى مۇسىلمانداردىڭ سانى 80%-عا، ال حريستياندار 30%-عا وسەدى دەپ كۇتىلۋدە. وسى كەزەڭنىڭ سوڭىنا قاراي الەمدە شامامەن 3,6 ملرد مۇسىلمان جانە 3 ملرد حريستيان بولادى. ءبىر مۇسىلمان ايەلگە ورتا ەسەپپەن 3,1 بالادان، ال حريستيان ايەلگە 2,5 بالادان كەلەدى.

بۇل ەسەپتەۋدىڭ باستى كورسەتكىشتەرى - تۋ مەن حالىقتىڭ جاس قۇرامى.

بولجام بويىنشا، 2070 جىلعا قاراي بارلىق حريستيانداردىڭ 54%-ى ساحارانىڭ وڭتۇستىگىندەگى افريكا ەلدەرىندە ءومىر سۇرەتىن بولادى.

كونگو دەموكراتيالىق رەسپۋبليكاسى اقش-تى باسىپ وزىپ، حريستياندار سانى ەڭ كوپ ەلگە اينالۋى مۇمكىن — شامامەن 299 ملن ادام بولادى دەپ كۇتىلەدى.

ال ەۋروپادا حريستيانداردىڭ ۇلەسى، كەرىسىنشە، 67%-دان 52%-عا دەيىن قىسقارىپ، اقش-تا 48%-عا دەيىن تومەندەۋى ىقتيمال.

الەمدە ەشبىر دىنگە جاتپايتىن ادامداردىڭ ۇلەسى 24,2%-دان 17%-عا دەيىن ازايادى. بۇل كورسەتكىشكە ءدىن ۇستانبايتىن ادامداردىڭ ەداۋىر بولىگى تۇراتىن قىتاي حالقىنىڭ قىسقارۋى اسەر ەتەدى.

ەگەر تۋ دەڭگەيى، كوشى-قون نەمەسە ءبىر دىننەن ەكىنشى دىنگە وتەتىن ادامداردىڭ سانى وزگەرسە، بۇل بولجام دا وزگەرۋى مۇمكىن.

ال قازاقستانداعى احۋال قالاي؟

جوعارىداعى زەرتتەۋدە قازاقستان ايدىكتەلىپ اتالمايدى. بىراق، اشىق دەرەكتەرگە كوز سالساق:

الگىندە – «World Population Review-ءدىڭ» وسى جىلعى ەسەبىندە: «قازاقستاندا دىنگە سەنبەيتىندەر سانى كۇرت ءوسىپ، الەمدە 14 ساتىعا بىراق شىقتى»، - دەگەن. كەيىن ونى فاكت-چەك تەرىستەدى.

سويتسە، «WIN-Gallup International» ساۋالناما قىپتى-مىس. ءسويتىپ، ەلدىڭ 49%-ى اتەيست دەپ قويىپ قالعان.

كەيىن انىقتالعانى - اتەيستەردىڭ ۇلەسى 8%-دىڭ تەگەرەگىندە بولسا، ءوزىن اسا ءبىر ءدىنيمىز دەپ ەسەپتەمەيتىن، ياعني ءدىندى قاتتى بەرىك ۇستانبايتىن ادامداردىڭ ۇلەسى 41 پايىز بوپتى. ءسويتىپ، ەكەۋىن قوسىپ جىبەرىپ، 49-دى شىعارىپ، قازاقستاندى 14-ءشى ورىنعا سەكىرتكەن-مىس.

ال رەسمي ستاتيستكا (2021 جىلعى حالىق ساناعى نەگىزىندە): «قازاقستان حالقىنىڭ 69,3 پايىزى مۇسىلماندار. 17 پايىزى زريستيان، 2,3 پايىزى اتەيست، 11 پايىزى ءدىنىن جاريا ەتپەگەندەر» دەپ ەسەپتەلىپتى.

Abai.kz

0 پىكىر