بۇگىن  «Nur Otan» پارتياسى قىزىلوردا وبلىستىق فيليالىنىڭ توراعاسى، وبلىس اكىمى ق.د. ىسقاقوۆتىڭ توراعالىعىمەن ساياسي كەڭەس بيۋروسىنىڭ كەڭەيتىلگەن وتىرىسى ءوتتى. وندا  كامەلەتكە تولماعاندارعا قارسى جاسالعان قىلمىستار جانە ونىڭ الدىن الۋ بويىنشا اتقارىلعان  جۇمىستار مەن جاستار اراسىنداعى جۇمىسسىزدىق، ورتا ارناۋلى وقۋ ورىندارىندا ءبىلىم الۋ ماسەلەلەرى تۋرالىدا دا ايتىلدى. 

وبلىستا كامەلەتكە تولماعاندارعا قارسى جاسالاتىن جانە جاسوسپىرىمدەردىڭ وزدەرىمەن جاسالعان قىلمىستار ازايماي وتىر. وسىعان وراي، وبلىس اكىمى  ىشكى ىستەر دەپارتامەنتىنە جۇمىستى كۇشەيتۋدى تاپسىرىپ، وبلىستىق پوليتسيا دەپارتامەنتىنىڭ باستىعىنىڭ  ورىنباسارى ش.اميتوۆكە بىرقاتار تاپسىرمالار بەردى.

"جاستارعا قاتىستى قىلمىستاردىڭ پروفيلاكتيكالىق شارالارى كۇشەيتىلسىن، ءتيىستى مەملەكەتتىك جانە قوعامدىق ۇيىمدارمەن بايلانىس ورناتىلسىن.  جاسوسپىرىمدەرگە قاتىستى جاسالاتىن قىلمىستاردىڭ الدىن الۋ جانە ونى جويۋ شارالارىنا بارشا قوعام بولىپ اتسالىسۋىمىز كەرەك. وبلىستىڭ ىشكى ىستەر ورگاندارىنىڭ ماتەريالدىق تەحنيكالىق بازاسىن نىعايتۋ ءۇشىن جىل سايىن قىرۋار قارجى ءبولىپ وتىرمىز. الايدا، جۇمىستارىڭىزدىڭ ناتيجەسىن كورىپ وتىرعان جوقپىن. اتالعان باعىتتاعى جۇمىستار كۇشەيتىلىپ، ءۇش اي مەرزىمدە ورىندالۋ قاجەت. بۇل ماسەلە جەكە ءوزىمنىڭ باقىلاۋىمدا بولادى" - دەدى وبلىس اكىمى قۋانىشبەك ىسقاقوۆ. 

Abai.kz